Ерөнхийлөгч У.Хүрэлсүх тэмээний тоо хоёр дахин өссөнд малчдад талархав

Монгол Улсын Ерөнхийлөгч У.Хүрэлсүх Дундговь аймгийн Мандалговь хотод ажиллаж, Тэмээчдийн улсын V зөвлөгөөнд оролцлоо. Тэрбээр үндэсний үйлдвэрлэлийг дэмжиж, экспортлогч орон болох зорилтыг дэвшүүлэн “Цагаан алт” болон “Хүнсний хувьсгал” зэрэг хөдөлгөөнүүдийг хэрэгжүүлж байгааг онцлов.

“Цагаан алт” хөтөлбөр нь малын гаралтай түүхий эдийг үнэ цэнтэй болгох, боловсруулах үйлдвэр байгуулах, мал сүргийн ашиг шимийг бүрэн ашиглах, малчдын орлогыг нэмэгдүүлэх зорилготой юм.

Ерөнхийлөгч тэмээ, ингэний ноосыг ямааны ноолууртай дүйцэхүйц чанартай гэж үнэлж, дэлхийн зах зээлд тэмээний ноосон бүтээгдэхүүн өндөр үнээр борлогдож байгааг дурдав.

Тэмээчдийн зөвлөгөөнд хэлсэн үгэндээ мал маллах арга ухаан, мэдлэг, туршлагыг үеэс үед өвлөн, таван хошуу малын ашиг шимийг нэмэгдүүлсэн малчдад талархал илэрхийлэв. Тэрбээр 20 жилийн өмнө Монгол Улсад 254 мянган тэмээ байсан бол одоо 501 мянгад хүрч, тоо хоёр дахин өссөн нь малчид, тэмээчдийн хөдөлмөрийн үр дүн гэж тэмдэглэв.

Монгол тэмээг олон улсад “Монгол тэмээ” хэмээн нэрлэдэг бөгөөд энэ нь монголчуудын өвөрмөц соёл, бахархалт өв гэдгийг онцоллоо.

Цаашид тэмээний ашиг шимийг сайжруулах, боловсруулах үйлдвэрийн хүчин чадлыг нэмэгдүүлэх, малчдын орлогыг нэмэгдүүлэхэд тэмээчдийн үүрэг, төр, хувийн хэвшил, малчдын хамтын ажиллагаа чухал болохыг дурдав.

Зөвлөгөөнөөр “Тэмээн соёлыг хадгалах, хамгаалах бодлого”, “Уур амьсгалын өөрчлөлт, цөлжилтийн нөлөө”, “Соёлын өвийг хамгаалах бодлого ба тэмээний соёл”, “Дэлхийд ховордсон монгол тэмээний үнэлэмжийг дээшлүүлэх” зэрэг сэдвээр илтгэл хэлэлцэв.

Улсын хэмжээнд 19 тэмээчин Хөдөлмөрийн баатар цол хүртсэн бөгөөд дэлхийд хоёр сая гаруй хос бөхт тэмээ байдгийн 500 мянга буюу дөрөвний нэг нь Монгол Улсад байдаг байна.

Ерөнхийлөгч У.Хүрэлсүх энэ жил тодорхой хуваарийн дагуу аймгуудад ажиллахаар төлөвлөж байна.