УИХ-ын дарга нар Үндсэн хуулийн өдрөөр хүндэтгэл үзүүлэв

Монгол Улсын Үндсэн хуулийн 34 жилийн ойн өдөрт зориулан Улсын Их Хурлын дарга Н.Учрал үе үеийн парламентыг удирдаж байсан дарга нар болон Улсын Их Хурлын Ерөнхий нарийн бичгийн дарга нарт хүндэтгэл үзүүлж, уулзалт зохион байгууллаа.

Уулзалтад БНМАУ-ын Дэд Ерөнхийлөгч асан Р.Гончигдорж, Улсын Их Хурлын дарга асан Н.Багабанди, Н.Энхбаяр, Ц.Нямдорж, Д.Лүндээжанцан, Д.Дэмбэрэл, З.Энхболд, М.Энхболд болон Улсын Их Хурлын Ерөнхий нарийн бичгийн дарга нар оролцов.

Хүндэт зочид Улсын Их Хурлын чуулганы “Их хуралдай” танхимаар зочилж, хүндэтгэлийн уулзалтын үеэр Н.Учрал дарга Үндсэн хуулийн түүхэн ач холбогдол, хууль сахин биелүүлэхэд парламентыг удирдаж байсан эрхмүүдийн үүрэг, оролцоог онцлов.

Тэрбээр парламентын үйл ажиллагааг боловсронгуй болгох, хууль тогтоомжийн дүн шинжилгээ хийх, олон нийтийн оролцоог нэмэгдүүлэх чиглэлээр хийж буй ажлуудаа танилцуулж, “Чөлөөлье” санаачилгыг дэвшүүлэн хууль тогтоомжийн зөрчил, давхардлыг арилгах, хүний эрх, эрх чөлөөг хамгаалах зорилт тавьж байгаагаа мэдэгдэв.

Мөн хууль тогтоох байгууллагын үйл ажиллагааг Үндсэн хуульд нийцүүлэх, парламентын шинэ соёлыг төлөвшүүлэхэд анхаарч буйгаа илэрхийлэв.

Үндсэн хуулийг түгээн дэлгэрүүлэх хүрээнд Монголын хараагүйчүүдийн үндэсний холбоотой хамтран брайль үсгээр хэвлэсэн хууль, аудио хувилбарыг олон нийтэд хүргэж байгааг дурдсан.

Түүнчлэн Парламентын судалгаа, хөгжлийн хүрээлэнгээр дамжуулан парламентын боловсролыг дээшлүүлэх, нийгмийн бүлэг бүрт зориулсан үйл ажиллагаа явуулах төлөвлөгөөтэй байгаагаа илэрхийлэв.

Уулзалтын төгсгөлд хууль тогтоох байгууллагын хуучин удирдлагууд “Монгол Улсын Үндсэн хуулийн өдөр”-ийн мэндчилгээг дэвшүүлж, Үндсэн хуулийг сахин биелүүлэх, парламентат ёсыг бэхжүүлэх талаар санал солилцсон юм.