БНХАУ Тайванийн хуульд оруулах өөрчлөлтийг тусгаар тогтнолын оролдлого хэмээн үзэж анхаарууллаа

БНХАУ Тайванийн эрх баригч намын хууль тогтоогчдын дэвшүүлсэн хоёр эргийн харилцааг зохицуулах хуульд өөрчлөлт оруулах саналыг Тайванийг хууль ёсоор тусгаар тогтнуулах оролдлого гэж үзэж, үүний улмаас зэвсэгт мөргөлдөөн гарах эрсдэл нэмэгдэж байгааг анхаарууллаа.

Тайванийн асуудал эрхэлсэн газрын Хэвлэлийн төлөөлөгч Чэнь Биньхуа ням гарагт мэдэгдэхдээ, уг санал нь Тайванийн олон нийтийн зонхилох байр суурийг үл тоомсорлож, Тайвань Хятадын нэг хэсэг гэсэн түүхэн, хууль зүйн бодит байдлыг үгүйсгэж байна гэж шүүмжилжээ. Тэрбээр “Тайванийн тусгаар тогтнол гэдэг бол дайн гэсэн үг” хэмээн онцолж, хууль ёсны тусгаар тогтнолын аливаа оролдлогыг няцаах бүрэн чадвартай гэдгээ илэрхийлсэн байна.

Бямба гарагт хууль тогтоогч Линь И-чүнь “Тайванийн бүс нутгийн ард иргэд ба эх газрын бүс нутгийн ард иргэдийн хоорондын харилцааг зохицуулах тухай хууль” нэрийг “Тайвань ба Бүгд Найрамдах Хятад Ард Улстай харилцах тухай хууль” болгон өөрчлөхийг санал болгожээ. Мөн “улсын нэгдэл биелэхээс өмнө” гэсэн үг хэллэг болон Тайванийн хоолойн хоёр талыг “бүс нутаг” гэж тодорхойлсон заалтыг хасах нь бодит нөхцөл байдалд илүү нийцнэ гэж үзсэн байна.

1990-ээд оны эхээр батлагдсан энэхүү хууль нь Тайвань ба эх газрын Хятадын хоорондын солилцоо, харилцааг зохицуулах зорилготой юм. Хуульд өөрчлөлт оруулах саналыг Ардчилсан дэвшилтэт намын 20 гаруй гишүүн дэмжиж, өнгөрсөн баасан гарагт өргөдөл гаргасан байна.

Бээжин Тайванийг Хятадын салшгүй нэг хэсэг гэж үздэг бөгөөд шаардлагатай тохиолдолд хүчээр нэгтгэх боломжийг үгүйсгэдэггүй. Сүүлийн жилүүдэд Тайвань руу чиглэсэн цэрэг, улс төрийн дарамтыг улам эрчимжүүлжээ.