АНУ-ын зүгээс Иранд тавьсан нефтийн хориг ОХУ-д ашигтай туслаа хэмээн The Wall Street Journal бичсэнийг РИА Новости дамжууллаа. Ираны нефтийн хориг тавигдсанаа хойш Иран Европ, Азийн хэд хэдэн оронд нефтиэ нийлүүлж байсан бөгөөд одоо энэ орон зайг Орос эзэлнэ хэмээн шинжээчид үзэж байна.
“Ираны нефтийг импортлогчдод Орос гараа сунгах магадлалтай. Иран, Оросын нефть чанарын хувьд ойролцоо” хэмээн The Wall Street Journal бичсэнийг Оросын шинжээчид нотолж байна. Оросын нефть бүтэц, чанарын хувьд Ираныхтай ойролцоо учраас Ираны нефтийг хэрэглэж байсан улсууд төвөггүйхэн импортлогчоо сольж чадна хэмээн Оросын шинжээчид хэлж байна. Нөгөө талаас газар зүйн байршлын хувьд ойр учраас тээвэрлэлтэд асуудал гарахгүй гэдгийг бас онцолж байна.
АНУ Иранд дахин хориг тавихдаа өөрсдийн нефтиэ санал болгоно гэж таамагласан байх магадлалтайг шинжээчид онцолж байна. АНУ-ын нефть олборлогчид энэ жил түүхэн рекорд тогтоох хэмжээний буюу өдөртөө 11 сая баррель нефть олборлож байгаа юм. Гэсэн хэдий ч АНУ өөрөө нефтийн томоохон импортлогч хэвээр байгаа юм. The Wall Street Journal сэтгүүлийн бичсэнээр ОХУ ч гэсэн нефть олборлолтоор сүүлийн 30 жил дэлхийд тэргүүлж байгаа. Өнгөрсөн аравдугаар сард нефтийн өдрийн олборлолт 11,41 сая баррель хүрсэн нь өмнөх 2017 оны мөн үетэй харьцуулахад 4,3 хувиар нэмэгдсэн үзүүлэлт юм.
Эх сурвалж: РИА НОВОСТИ
