Үндэсний номын баярын өдрөөр доктор, дэд профессор Ц.Мөнхцэцэгийн “Цахим популизм буюу сонгууль дахь сошиал сүлжээний нөлөө” номын нээлт боллоо.
Доктор Ц.Мөнхцэцэгийн энэ номд 2013, 2017 оны Монгол улсын Ерөнхийлөгчийн сонгууль, 2012, 2016 оны АНУ-ын Ерөнхийлөгчийн сонгууль, 2012, 2016 оны УИХ-ын сонгууль, 2017 оны ХБНГУ-ын Бундестагийн сонгуулийн үйл явцад хийсэн судалгаа, улс төрийн намын санхүүжилт, гишүүнчлэлийн талаарх бодлогын судалгаа, зөвлөмж, Үндсэн хуулинд оруулах өөрчлөлт, ерөнхийлөгчийн ба парламентын засаглалын харьцуулсан судалгаа зэрэг өнөөгийн Монголын улс төрд тулгамдаад байгаа олон асуудлыг багтаасан байна.
Ц.Мөнхцэцэг нь Өнөөдөр сонины Улс төр, гадаад мэдээний албанд сэтгүүлч, тоймч орчуулагч, 2002 оноос МУБИС-д багш, 2008 оноос Улс төрийн коммуникацийн хүрээлэнгийн захирал, 2018 оноос МАН-ын Ерөнхий нарийн бичгийн даргын зөвлөхөөр ажиллаж байгаа юм. Тэрбээр ХБНГУ-ын Кобленц Ландау их сургууль, АНУ-ын Охайо мужийн их сургуульд зочин судлаачаар ажиллаж байсан бөгөөд олон улсын болон үндэсний хэмжээний 20 гаруй бодлогын болон харьцуулсан судалгааны эксперт, зөвлөхөөр ажилласан улс төрийн коммуникаци, сонгуулийн кампани, улс төрчийн имиж мейкингийн мэргэжилтэн юм.
Нээлтийн үеэр зохиогч “Интернетийн хэрэглээ асар хурдацтай нэмэгдсэн сүүлийн хэдхэн жилд зөвхөн сонгуулийн кампани төдийгүй улс төрийн бусад бүхий л үйл явцад сошиал сүлжээний үүрэг нэмэгдэх болов. Популист улс төрчид болон намууд сошиал сүлжээний хяналт багатай байдлыг ашиглан хуурамч мэдээ, гүтгэлэг тараах үйлдэл хийх болсон нь АНУ, Франц, Герман зэрэг уламжлалт ардчилсан дэглэмт улс орнуудын сонгуулиас харагдаж байна. Өөрөөр хэлбэл популист улс төр нь нийгмийн сүлжээгээр дамжин цахим популизм болж хувирч байгаа юм” гэж онцолж байлаа.
Ингээд нээлтийн үеэр хүндэт зочдын хэлсэн үгийг хүргэе.
Монгол улсын гавьяат багш, доктор, профессор Ц.Ганболд: “Цахим популизм буюу сонгууль дахь сошиал сүлжээний нөлөө” ном бол улс төрчдийн ширээний ном болно.
Доктор Ц.Мөнхцэцэг энэ номондоо Монголын улс төрийн шинжлэх ухаанд урьд өмнө судлагдаж байгаагүй цоо шинэ сэдэв болох “Цахим популизм”-ын асуудлыг Монголын болон АНУ, ХБНГУ-ын сүүлийн сонгуулиудын жишээн дээр авч үзэж судалгааны эргэлтэнд оруулж байгаагаараа шинжлэх ухааны ихээхэн ач холбогдолтой ажил болжээ.
Энэ бүтээл нь улс төрийн чиглэлээр суралцаж байгаа оюутан залуус, улс төрчид, улс төр сонирхогч хэн бүхэнд хэрэгтэй ном болох нь дамжиггүй. Мөн энэхүү номонд дэлхий дахины улс төр, сонгуулийн үйл явц, улс төрийн намын төлөвшлийн тулгамдсан асуудлаарх олон улсын жишээ, туршлагыг авч үзсэнээрээ Монголын улс төрчдийн хувьд байнга унших “Ширээний ном” нь болно гэж бодож байна.
МАН-ын Ерөнхий нарийн бичгийн дарга Д.Амарбаясгалан: Сошиал сүлжээний улс төрийн үйл явцад үзүүлж буй нөлөөлөл нэмэгдсээр байна.
Доктор Ц.Мөнхцэцэгийн маань “Цахим популизм буюу сонгууль дахь сошиал сүлжээний нөлөө” номонд дэлхий дахины улс төрийн намууд, сонгуулийн үйл явцад тулгамдаж байгаа асуудал, дэлхий даяар газар авч буй популизм, тэр дундаа сошиал сүлжээгээр үндсэрхэг үзэл, хуурамч мэдээлэл хэрхэн түгэн дэлгэрч улс орнуудын сонгуулийн дүнд нөлөөлж байгааг авч үзсэн нь яах аргагүй цаг үеэ олсон чухал судалгаа болжээ.
Сошиал сүлжээний улс төрийн үйл явцад үзүүлж буй нөлөөлөл жил ирэх тутам нэмэгдэхийн зэрэгцээ энэ сүлжээгээр тархаж буй хуурамч мэдээлэл, хүний нэр төрд халдах, хүчирхийлэлд уриалан дуудах явдлыг хэрхэн зохицуулах нь улс орнуудын тулгамдсан асуудал болоод байна. Зарим улс орнууд сошиал сүлжээг зохицуулах хууль тогтоомжууд баталж эхэллээ. Үг хэлэх, үзэл бодлоо илэрхийлэх эрхийг зөрчихгүйгээр хүний нэр төр алдар хүнд, үндэсний аюулгүй байдал, нийгмийн тогтворт байдалд сөргөөр нөлөөлж болзошгүй сошиал сүлжээн дэх мэдээллийг хэрхэн зохицуулах вэ гэдэг асуудал тулгамдаж байгаа юм.
ШУА-ын Философийн хүрээлэнгийн судлаач, шинжлэх ухааны доктор, профессор Д.Болд-Эрдэнэ: Намын санхүүжилт, гишүүнчлэлийг боловсронгуй болгох судалгаанууд их ач холбогдолтой.
Монголын улс төрийн намын төлөвшлийг судалдаг эрдэмтэн хүний хувьд би доктор Ц.Мөнхцэцэгийн энэ номд Монголын улс төрийн намын санхүүжилт, намын гишүүнчлэлийг боловсронгуй болгох талаар бодлогын судалгаа зөвлөмжүүд орсон нь УИХ-аар Улс төрийн намын тухай шинэ хуулийг хэлэлцэх гэж байгаа өнөө үед маш чухал ач холбогдолтой эрдэм шинжилгээний ажил болжээ гэж дүгнэж байна. Монголын улс төрийн тогтолцоог боловсронгуй болгоход эрдэмтэн судлаачдын энэ мэт шинэлэг тоо баримт, онолын судалгаа бүхий ажлууд чухал хувь нэмэр оруулах болно.
