Өнгөрсөн оны дөрөвдүгээр сард нэг кг ноолуурын ханш 110 мянган төгрөгт хүрч малчдын магнай тэнийж байсан. Удалгүй 60 мянга хүртэл буураад тогтож байсан юм. Тэгвэл энэ хавар ноолуурын ханш мөн л өснө гэсэн тооцоо байна.
Ноолуурын ханш өндөр тогтох хэрээр 160.7 мянган өрхийн амьжиргаанд сайнаар нөлөөлөх боловч нөгөө талаар үндэсний үйлдвэрлэчдэд хүндээр тусдаг байна.
Монголын ноолуурын зах зээлд гарааны үнэ чухалд тооцогддог. Энэ нь хятадууд үнэ тогтоодогтой холбоотой. Тэд хямд үнээр авч эхэлбэл малчид түүгээр нь л ноолуураа борлуулахаас өөр аргагүй болдог. Нэмж дурдахад 2015 оны мал тооллогын дүнгээр 23 сая толгой ямаа тоологдож байсан бол 2017 онд 27 сая болж өсжээ.
