Эрүүл мэндийн яамнаас 12-17 насны хүүхдийг Pfizer вакцинаар дархлаажуулах ажлыг түр зогсоож байгааг мэдэгдээд байна.
Учир нь Эрүүл мэндийн байгууллагаас 12-15 насны 205,815, 16-17 насны 84,253 хүүхдийг вакцинд хамруулах төлөвлөгөөг гаргасан байна. Богино хугацаанд 12-15 насны 96,511, 16-17 насны 54,034 хүүхэд вакцины нэгдүгээр тунд хамрагджээ. Өөрөөр хэлбэл, 150,000 орчим хүүхэд вакцины нэгдүгээр тунд маш богино хугацаанд хамрагдсан байгаа юм. Иймд вакцины татан авалттай холбоотойгоор 12-17 насны хүүхдүүдэд Pfizer вакцины нэгдүгээр тунг түр хойшлуулах шийдвэр гарчээ.
ЭМЯ-ны хэвлэлийн төлөөлөгч Б.Ууганбаяр “Бид вакцины татан авалтаар нөөцөө бүрдүүлсний дараа үлдсэн хүүхдүүдээ вакцинд хамруулах боломжийг бүрдүүлнэ. Харин одоогоор нэгдүгээр тунгаа авсан 150,000 хүүхдэд вакцины хоёрдугаар тунг нь яг хугацаанд нь хийх бөгөөд хоёрдугаар тунг вакцин хадгалах байруудад хадгалсан” хэмээв.
Л.Баяр
