Урлаг, Спорт

Х.Цагаанбаатар шигшээ багт багтсангүй

Жүдо бөхийн Токио-2019 ДАШТ-д амжилт тааруу оролцсон жүдо бөхийн үндэсний шигшээ багийн дасгалжуулагчийн алба энэ сарын 12-д бүрэн бүрэлдэхүүнээрээ огцорч буйгаа мэдэгдсэн. Үүний дараа үндэсний шигшээ багийн дасгалжуулагчийн баг хэрхэн бүрдэх талаар олны дунд хүлээлт үүсээд байсан бөгөөд гавъяат дасгалжуулагч Халиуны Болдбаатар шигшээ багийг удирдахаар болоод байсан.

Тэгвэл дөнгөж сая үндэсний шигшээ багийн дасгалжуулагч Х.Болдбаатарын багт ажиллах дасгалжуулагчдын нэрс тодорсон байна. Жүдо бөхийн үндэсний шигшээ багийн дасгалжуулагчийн албанд Х.Цагаанбаатар, С.Ням-Очир, Д.Нямхүү, Д.Цэрэнханд нарын хэн нь ч багтсангүй. Олимпийн хүрэл, ДАШТ-ий алт, хошой хүрэл медальт Х.Цагаанбаатар хэдхэн хоногийн өмнө өөрийн жүдо бөхийн “Мон-Алтиус Цагаанбаатар” академиа нээгээд байсан юм.

Жүдо бөхийн үндэсний шигшээ багийн ахлах дасгалжуулагч Х.Болдбаатарын багт “Алдар” спорт хорооны дасгалжуулагч П.Нямлхагва, Ч.Болдбаатар, Б.Батгэрэл болон МУГТ, дэлхийн аварга шалгаруулах тэмцээний хүрэл медальт М.Бундмаа нар багтжээ. Манай улсын олимпийн наадмын гол төрлүүдийн нэг жүдо бөхийн үндэсний шигшээ багийн дасгалжуулагчийн бүрэлдэхүүн ийнхүү тодорлоо. Жил хүрэхгүй хугацааны дараа болох Токио-2020 олимпийн наадам болно. Олимпийн багаа бүрдүүлэх их ажил, олимпийн наадамд амжилттай оролцох хариуцлага ирж байна. Манай шигшээ багийн өмнө энэ онд зохиогдох Абу-Дабигийн Их Дуулга, Токиогийн Их Дуулга тэмцээнүүд хүлээж байна.

ХОЛБООТОЙ МЭДЭЭ

Back to top button
Close