Уул уурхай, олборлолтын салбар сүүлийн хэдэн жил тогтвортой сэргэж буй ч салбарын чанаргүй зээлийн хувь өндөр хэвээр байна. Банкууд уул уурхайн салбарт тогтмол зээл олгосоор 2014 оны хоёрдугаар улиралд зээлийн нийт үлдэгдэл түүхэн дээд хэмжээ болох 1.4 их наяд төгрөгт хүрч, чанаргүй болон хугацаа хэтэрсэн зээл нийт зээлийн 20 орчим хувийг эзэлж байсан. Тэгвэл хоёр жилийн дараа уул уурхайн нийт зээлийн үлдэгдэл бараг хоёр дахин буурч 762 тэрбум төгрөг болж, салбарын нийт зээлийн үлдэгдлийн 78 хувь нь чанаргүй эсвэл хугацаа хэтэрсэн зээлийн ангилалд хамаарагджээ.
Харин 2017 он гарсаар уул уурхайн салбар сэргэж банкууд зээл олголтоо нэмэгдүүлж өдгөө салбарын нийт зээлийн үлдэгдэл 2014 оны оргил үетэй тэнцэх болж чанаргүй болон хугацаа хэтэрсэн зээлийн эзлэх хувь 36,2 хувь хүртэл буурчээ. Нийт зээлийн 36 хувь нь чанаргүй эсвэл хугацаа хэтэрсэн байгаа нь маш өндөр үзүүлэлт. Энэ оны хоёрдугаар улирлын байдлаар уул уурхай, олборлолтын салбарын нийт зээлийн үлдэгдлийн 71 хувь нь төгрөгийн зээл, төгрөгийн зээлийн жилийн дундаж хүү 16,1 хувь, валютын жилийн дундаж хүү 13,2 хувь байна. Мөн 462 хувь хүн, аж ахуй нэгжид уул уурхай, олборлолтын чиглэлээр зээл олгосон байна. Нийт зээлийн жигнэсэн дундаж хугацаа 13 сар байгаа нь уул уурхайн салбарт богино хугацааны зээлүүд зонхилдог болохыг харуулж байна.