УИХ Нийгмийн сүлжээнд хүүхдийн оролцоог зохицуулах хуулийн төслийг хэлэлцэв

УИХ-ын чуулганы хуралдаанаар П.Наранбаяр гишүүн болон бусад найман гишүүний өргөн мэдүүлсэн Нийгмийн сүлжээнд хүүхдийн оролцоог зохицуулах тухай хуулийн төслийг хэлэлцлээ.

Хуулийн төсөлд 13 хүртэлх насны хүүхдийг нийгмийн сүлжээнд бүртгэл үүсгэж хэрэглэхийг хориглох зохицуулалт багтаж, 13-16 насны хүүхдэд зориулсан зохистой хэрэглээ болон аюулгүй байдлын хамгаалалтыг тохиргоотойгоор ашиглах заалтууд оржээ.

Мөн хүүхдийн хувийн мэдээллийг хамгаалах, эцэг эхийн хяналтыг сайжруулах болон хориотой, хүүхдэд хортой агуулгаас сэргийлэх технологийн хамгаалалтыг хуулийн төсөлд тусгасан байна.

П.Наранбаяр гишүүн хэлэхдээ, эцэг эхчүүд хүүхдүүдийн гар утас ашиглаж байгаа контентыг мэдэж, цахим халдлагаас хамгаалах шаардлага үүсэж байгаа тул эцэг эхийн эрх үүргийг тодорхой тусгасан сургалт, зөвлөгөөг мэргэжлийн байгууллагаас авах зохицуулалт хэрэгтэй гэж онцлов.

Цахим хөгжил, инноваци, харилцаа холбооны сайд Ч.Номин утасны дугаар олгохдоо иргэний бүртгэл болон насны бүртгэл хийж, технологийн шийдлээр хүүхдийн сүлжээний хэрэглээг хянах боломжтой болохыг тайлбарлав.

УИХ-ын гишүүдийн 80 хувь нь уг хуулийн төслийг хэлэлцэх нь зүйтэй гэж үзсэн юм.