“Түмэншувуут” ХК өндөгний тусгаар тогтнолыг бататгалаа

“Түмэншувуут” ХК-ийн захирал Ж.Болд УИХ-ын сонсголын үеэр хөндөгдсөн хөдөө аж ахуйн салбарын хөнгөлөлттэй зээлүүдийн талаар мэдээлэл өглөө. Тэрбээр компани нь 45 тэрбум төгрөгийн зээл авсан ба уг зээлээрээ ТШ2, ТШ3 аж ахуйг байгуулж, үйлдвэрлэлийн хүчин чадлаа нэмэгдүүлсэн гэж тайлбарласан байна.

Ж.Болд зээлээ 100 хувь зориулалтын дагуу зарцуулж, одоогоор төлбөрийн хуваарийн дагуу төлж буйг онцлов. Тэрбээр Ковидын үед өндөгний хомсдол үүссэн нөхцөл байдлыг дурдаад, “Түмэншувуут” ХК нь өндөгний импортын хэрэгцээг бууруулах замаар тусгаар тогтнолоо бататгасан гэж тэмдэглэв.

Хязгаарлалттай үед үйлдвэрлэлийн хүчин чадлыг хурдан хугацаанд нэмэгдүүлэхэд хөнгөлөлттэй зээл нь стратегийн ач холбогдолтой байсан гэж Ж.Болд онцолсон байна. Тэрээр одоогийн байдлаар хил хаагдсан ч өндөг хомсдох эрсдэлгүй болохыг мэдэгдлээ.