Монгол Улсын прокуророос мансууруулах болон сэтгэцэд нөлөөт бодис хэрэглэх, хадгалах хэргийн талаарх мэдээлэл гаргав
Монгол Улсын ерөнхий прокурорын газраас мэдээлснээр, С.Б, Р.М нар бүлэглэн Бүгд Найрамдах Түрк улсаас “мөс” гэх нэршилтэй, метамфетамины агууламжтай 44.8 грамм жинтэй хориглосон сэтгэцэд нөлөөт бодисыг бусдаар дамжуулан захиалж, худалдаалах зорилгоор Монгол Улсын хилээр хууль бусаар нэвтрүүлжээ.
Тэд энэ бодисыг 2026 оны 1 дүгээр сарын 15-ны өдрийг хүртэлх хугацаанд амины орон сууцанд хадгалсан хэрэгт Эрүүгийн хуулийн 20.7 дугаар зүйлийн 3 дахь хэсгийн 3.3 дахь заалтаар яллах дүгнэлт үйлдэж, хэргийг шүүхэд шилжүүлсэн байна.
Прокурорын байгууллагаас өгсөн мэдээллээр, 2026 оны 9 дүгээр сарын 18-ны өдрийн байдлаар Эрүүгийн хуулийн 20.7 дугаар зүйлд заасан “Мансууруулах бодис, сэтгэцэд нөлөөт бодисыг хууль бусаар ашиглах” хэрэгт 260 хүн яллагдагчаар татагдаж, 182 хэрэгт яллах дүгнэлт үйлдэн, хэргийг шүүхэд шилжүүлжээ. Үүнээс улсын хилээр хууль бусаар нэвтрүүлсэн хэргүүдэд 20 хүн холбогдон 14 хэрэг шүүхэд шилжсэн байна.
Нийслэлийн прокурорын газраас өнгөрсөн 7 хоногт буюу 2026 оны 9 дүгээр сарын 14-нөөс 18-ны хооронд 7 хүнд холбогдох 5 хэрэг анхан шатны шүүхээр шийдвэрлэгдсэн бөгөөд шүүх 5 хүнд 1-9 жилийн хорих ял, 2 хүнд зорчих эрхийг 1 жилээс 353 хоногийн хооронд хязгаарлах ял оноосон байна.
Харин хэрэгт холбогдсон зарим иргэдийн шүүхийн шийдвэр нь:
– Т.Х нь 2025 оны 2 дугаар сарын 17-ны шөнө Чингэлтэй дүүрэгт тетрагидроканнабинол агууламжтай 4 грамм сэтгэцэд нөлөөт бодисыг хууль бусаар олж авч, орон байранд хадгалсныг Эрүүгийн хуулийн 20.7 дугаар зүйлийн 1 дэх хэсэгт зааснаар ялласан. Шүүх түүнд зорчих эрхийг 1 жил, 353 хоногоор хязгаарлах ял оноосон.
– А.Б нь 2025 оны 11 дүгээр сард Төв аймагт 1,260.2 грамм дельта-9 тетрагидроканнабинол агуулсан хориглосон бодисыг худалдаалах зорилгогүйгээр хууль бусаар түүж бэлтгэн, орон байранд хадгалсныг Эрүүгийн хуулийн 20.7 дугаар зүйлийн 1 дэх хэсэгт зааснаар ялласан. Шүүх түүнд зорчих эрхийг 1 жил 6 сарын хугацаагаар хязгаарлах ял оноож, гэмт хэрэгт ашигласан тээврийн хэрэгслийн үнийг улсын орлого болгож шийдвэрлэсэн.
– Р.А нь 2026 оны 4 дүгээр сарын 6-нд Баянзүрх дүүрэгт “өвс” гэх нэршилтэй, дельта-9 тетрагидроканнабинол агуулсан 30.2 грамм хориглосон бодисыг худалдаалах зорилгогүйгээр хууль бусаар олж авч, орон байранд хадгалсны улмаас шүүхээс 1 жилийн хорих ял оноосон.
Монгол Улсад мансууруулах болон сэтгэцэд нөлөөт бодисыг хууль бусаар олж авах, хадгалах нь Эрүүгийн хуулиар хориглогдсон байна. Энэхүү гэмт хэрэг нь хүн амын эрүүл мэнд, нийгмийн аюулгүй байдалд сөрөг нөлөө үзүүлдэг бөгөөд эдийн засаг, хүний генийн санг мөн хордуулах сөрөг үр дагавартай гэж мэргэжлийн байгууллага тайлбарлаж байна.
Эдгээр бодис нь мэдрэлийн системийг гэмтээж, тархины хэвийн үйл ажиллагааг алдагдуулж, хараат байдлыг бий болгодог. Үүний үр дүнд ёс суртахуун, оюун санааны үнэт зүйлс өөрчлөгдөж, хууль бус үйлдэл үйлдэх үндэс болдог гэжээ.