Цахимаар мал, мах хямд үнээр зарна хуурамч зар ашиглан 600 сая төгрөг залилжээ
2026-09-20 18:001min
Баянгол дүүргээс мал, махны хуурамч зар ашиглан 600 сая төгрөгийн залилан үйлдсэн этгээдийг баривчилж, шүүх цагдан хорих шийдвэр гаргалаа. Иргэдэд цахим зар сурталчилгаанд болгоомжтой хандахыг зөвлөж байна.
Цахим орчинд мал, мах болон тугалтай хямд үнээр олноор нь зарна гэсэн хуурамч зар мэдээллийг ашиглан иргэдийг залилсан этгээдийг Баянгол дүүргээс баривчилжээ.
Мөрдөн шалгах ажиллагааны явцад уг этгээд нь 600 сая гаруй төгрөгийн хохирол учруулсан нь тогтоогдсон бөгөөд энэ хэрэгт холбогдох шалгалт үргэлжилж байна.
Шүүхийн захирамжаар тухайн этгээдэд цагдан хорих таслан сэргийлэх арга хэмжээ авсан байна.
Иргэдэд Цагдаагийн ерөнхий газраас цахим орчинд байршуулсан хэт хямд үнэтэй бараа бүтээгдэхүүний зар мэдээлэлд болгоомжтой хандаж, худалдан авалтын урьдчилгаа төлбөр шилжүүлэхээс өмнө мэдээллийн үнэн зөвийг сайтар нягталж байхыг анхаарууллаа.