Нийтийн тээврийн үйлчилгээ есдүгээр сарын 1-нээс өвлийн цагийн хуваарьт шилжинэ
Нийслэлийн нийтийн тээврийн үйлчилгээ 2026-2027 оны хичээлийн шинэ жил эхлэхтэй холбоотойгоор есдүгээр сарын 1-ний өдрөөс өвлийн цагийн хуваарьт шилжинэ.
“Зорчигч тээвэр дөрөв” ОНӨААТҮГ-ын захирал С.Баттулга энэ талаар дурдсанаар, шинээр эхлэх хичээлийн жил, нийслэлийн иргэдийн зорчилт, хөдөлгөөн нэмэгдэх тул нийтийн тээврийн ачаалал өсөх төлөвтэй байна. Үүний дагуу байгууллага нь автобусны техникийн бүрэн бүтэн байдал, жолоочийн хангалт, сэлбэг хэрэгслийн нөөц, үйлчилгээний чанар, аюулгүй байдлыг хангах чиглэлд бэлтгэлээ бүрэн хангажээ.
Өвлийн цагийн хуваарьт шилжихэд “Зорчигч тээвэр дөрөв” ОНӨААТҮГ нийт 12 чиглэлд 91 автобус ажиллуулж, тэдгээрийн техникийн үзлэг, засвар үйлчилгээг үе шаттайгаар хийсэн байна. Тус байгууллага нь өвлийн улиралд тасралтгүй үйлчилгээ үзүүлэхээр автобусны бэлэн байдлыг бүрэн хангажээ.
Сурагчдын зорчилтын аюулгүй байдлын үүднээс сургуулийн зориулалтын 8 автобусанд шаардлагатай засвар, техникийн үзлэгийг хийж, 2026-2027 оны хичээлийн шинэ жил эхлэхэд бэлэн болгожээ. Эдгээр автобус 8 чиглэлд үйлчлэж, өдөрт дунджаар 1,000 гаруй сурагчид үйлчилгээ үзүүлэх юм.
С.Баттулга хэлэхдээ, сурагчдын аюулгүй зорчих нөхцөлийг голлон анхаарч, автобусуудыг стандартын дагуу цэвэр цэмцгэр, тав тухтай байлгахын зэрэгцээ туршлагатай жолооч нарыг ажиллуулж байгаа гэдгийг онцлов.
Өвлийн улиралд автобусны техникийн шинжилгээ, хянах, засвар үйлчилгээг тогтмол явуулж, эвдрэл гэмтлийг шуурхай арилгах ажлыг зохион байгуулдаг. Мөн Yutong ZK6116HG загварын 95 автобус, тусгай зориулалтын Dongfeng маркийн 8 автобусыг тасралтгүй ажиллуулах зорилгоор сэлбэг хэрэгслийг нөөцлөн авсан байна.
Иргэдийн зорчилт нэмэгдэх үед хүний нөөц болон техник үйлчилгээний бэлэн байдлыг зохион байгуулж, цаг агаар, замын ачаалал нэмэгдэхтэй холбоотой саатал гарахаас сэргийлэх чиглэлд анхаарч ажиллаж байна.
Нийтийн тээврийн үйлчилгээний хүртээмж, тогтвортой байдлыг хангахын тулд автобусны техникийн нөхцөлийг сайжруулж, жолооч нар, техникийн ажилтнуудын бэлэн байдлыг нэмэгдүүлэхээр ажиллаж байгаа юм.
Цаашид нийтийн тээвэр аюулгүй, найдвартай, соёлтой үйлчилгээ үзүүлэхээс гадна зорчигчдын аюулгүй байдлыг хангах, үйлчилгээний чанар, шинэчлэлийг бүрэн дэмжихээр зорьж байна.