Сөүлийн хот ахмад настнуудыг автобусанд үнэ төлбөргүй зорчуулах журам баталлаа
Сөүлийн хотын зөвлөл 70 ба түүнээс дээш насны иргэдийг нийтийн автобусанд үнэ төлбөргүй зорчуулах журам баталлаа. Хотын даргын тогтоосон шалгуурын дагуу ахмад настнуудын автобусны төлбөрийг бүхэлд нь эсвэл хэсэгчлэн татааслах шийдвэрийг зөвлөлийн хуралдаанаар 69-1-ийн саналаар баталсан байна. Татаасын хэмжээ болон хэрэгжүүлэх аргачлалыг хотын захиргаа дараа нь тодорхой болгох юм.
Мөн хотын захиргаа метроны үнэгүй зорчих насыг одоогийн 65-аас 70 болгон нэмэгдүүлэх талаар судалж байгаа аж. Ахмад настнуудад автобусанд үнэгүй зорчих эрх олгох санаачилга нь Сөүлийн хотын дарга О Сэ Хүний орон нутгийн сонгуулийн мөрийн хөтөлбөрийн нэг хэсэг байжээ.
Энэхүү бодлого нь метроны буудалгүй бүсэд амьдардаг иргэдэд нийтийн тээврийн хүртээмжийг нэмэгдүүлэх зорилготой юм. Санхүүгийн ачааллыг багасгах үүднээс үнэгүй зорчих эрхийг сард 14 удаа хязгаарлах боломжтойг хотын захиргаа мэдээлсэн байна.
Хотын захиргааны тооцоолсноор автобусанд үнэгүй зорчих эрхийг хэрэгжүүлэхэд жилд ойролцоогоор 52.5 тэрбум вон шаардлагатай бөгөөд метроны үнэгүй зорчих насыг 70 болгох нь жилд 57.2 тэрбум воны нэмэлт орлогоор энэхүү зардлыг нөхөх боломжтой гэжээ.