Н.Учрал: Ахмадуудын тэтгэврийг шударга тогтолцоонд шилжүүлэх гурван шатлалтай шинэчлэл хийнэ

Монгол Улсын Ерөнхий сайд Н.Учрал сэтгүүлчдийн асуултад хариулахдаа ахмадуудын тэтгэврийг шударга тогтолцоонд шилжүүлэх шаардлагатайг онцлов. Засгийн газрын ирэх долоо хоногийн хуралдаанаар Нийгмийн даатгалын тухай хуулийн шинэчилсэн төслийг хэлэлцэн УИХ-д өргөн барихаар төлөвлөжээ.

Ерөнхий сайд Н.Учрал тэтгэврийн шинэчлэл нь гурван шатлалтай байхыг зорьж байгааг хэлэв. Үүнд хувийн нэмэлт тэтгэвэр, ахмад настны баталгаат тэтгэвэр, мөн Нийгмийн даатгалын шимтгэл төлсөн хэмжээгээр тэтгэвэр тогтоох зарчмыг сайжруулах асуудал багтаж байна.

Тэрбээр одоогийн тэтгэвэр бодох аргачлалд алдаа байгааг тэмдэглэн, ахмадуудын тэтгэвэр харилцан адилгүй байгаа талаар жишээ дурдлаа. Тэтгэврийг бүгдэд нь 1.5 сая төгрөг болгох нь боломжгүй бөгөөд ингэвэл өндөр шимтгэл төлсөн хүмүүс бага шимтгэл төлсөн хүмүүстэй ижил хэмжээний тэтгэвэр авах нөхцөл үүсэхийг онцлов.

Н.Учралын хэлснээр, 1995 оноос хойш өндөр шимтгэл төлсөн хүмүүст хохирол учруулахгүйгээр шинэчлэлийг хийх шаардлагатай бөгөөд шинэ хуулийг баталснаар ирэх жилийн төсөвт тусган, инфляцтай уялдуулсан тэтгэврийн нэмэлт хийх боломжтой болно гэжээ.