“Disneyland Paris”-т “Frozen” сэдэвт шинэ парк нээгдлээ

“Disneyland Paris” цогцолборт “The Walt Disney” компанийн “Frozen” хүүхэлдэйн киноноос сэдэвлэсэн “World of Frozen” шинэ хэсэг албан ёсоор нээгдлээ. Энэхүү төсөл нь хоёр тэрбум гаруй ам.долларын өртөгтэй томоохон шинэчлэлийн гол хэсэг байв.

Шинэчлэлийн хүрээнд “Disneyland Paris” цогцолборын “Walt Disney Studios Park” нэрийг “Disney Adventure World” болгон өөрчилсөн байна. Шинэ өргөтгөлд Арэнделл хэмээх зохиомол хаант улсыг бодитоор бүтээжээ.

36 метр өндөр мөсөн уулын оройд Эльзагийн ордон байрлах бөгөөд доор нь Норвегийн хэв маягтай загасчны тосгон бий. Зочид усан завины аяллаар явж, киноны дүрүүдтэй уулзаж, төрөл бүрийн шоу үзэх боломжтой юм.

Нээлтийн арга хэмжээнд Пенелопа Круз, Наоми Кэмпбелл, Тейана Тейлор зэрэг алдартнууд оролцсон бөгөөд “Disney” компанийн шинэ гүйцэтгэх захирал Жош Д’Амаро анх удаа тайзан дээр гарч үг хэлжээ. Тэрбээр шинэ хэсгийг компаниудын хувьд шинэ шатанд гарсан чухал мөч гэж тодорхойлсон байна.

Францын ерөнхийлөгч Эммануэль Макрон энэхүү төслийг улсын аялал жуулчлал, эдийн засагт чухал нөлөөтэй гэж үнэлж, шинэ өргөтгөлөөр 1000 орчим ажлын байр бий болохыг дурдсан. Энэ нь “Disneyland Paris”-ийн 34 жилийн түүхэн дэх хамгийн том шинэчлэл юм.

Цаашид “The Lion King” сэдэвт шинэ хэсэг нээгдэхээр төлөвлөгдөж байгаа бөгөөд энэ хэсэг нь илүү олон үзвэр, ресторан, орчин үеийн шоугаар баяжих бөгөөд нийт талбай нь бараг хоёр дахин томрох юм. Европын “Disneyland” өнөөдөр тивийн хамгийн том аялал жуулчлалын төвүүдийн нэг болж, шинэ “Frozen” ертөнцөөрөө зочдод шинэ мэдрэмжийг бэлэглэж байна.