Эмнэлгийн төлбөрийн мөнгийг хувьдаа авсан эрхлэгчийн хэргийг шүүхэд шилжүүлэв

Прокурорын байгууллага энэ сарын 02-06-ны өдрүүдэд хэрэг бүртгэл, мөрдөн байцаалтын 48,426 эрүүгийн хэрэгт хяналт тавьжээ. Тус хугацаанд 1,091 гэмт хэргийн шинжтэй гомдол, мэдээлэл бүртгэгдсэн бөгөөд 767 хэрэг шинээр нээгдэж, 256 хэрэгт яллах дүгнэлт үйлдсэн байна.

Нийслэлийн прокурорын газраас яллах дүгнэлт үйлдэж, шүүхэд шилжүүлсэн авлигын болон бусад гэмт хэргийн дунд дараах хэрэгсүүд багтжээ. Ц.Б нь эмнэлгийн тасгийн эрхлэгчээр ажиллахдаа төлбөртэй өрөөнд хэвтэн эмчлүүлсэн иргэдийн 22.4 сая төгрөгийг байгууллагын дансанд тушаалгүй өөртөө авсан хэрэгт Эрүүгийн хуулийн 22.1 дүгээр зүйлийн хоёр дахь хэсэгт зааснаар яллах дүгнэлт үйлдэж, холбогдох шүүхэд шилжүүлсэн байна.

Мөн Г.А нь нийтийн албан тушаалтнаар ажиллахдаа бусдад хууль бус давуу байдал бий болгох үүднээс гаалиар ачаа барааг хурдан нэвтрүүлэх үүрэг чиглэл өгч, 10 сая төгрөгийн хахууль авсан хэрэгт яллах дүгнэлт үйлдэжээ. Түүнчлэн Т.Н нь давуу байдал бий болгох зорилгоор бусдад хахууль өгсөн хэрэгт яллах дүгнэлттэйгээр шүүхэд шилжсэн байна. Эдгээр хэргүүдийг Улсын Ерөнхий Прокурорын Газраас мэдээлжээ.