Гавьяат багш С.Шаарийбуу Ерөнхий сайдад ханджээ

Монгол Улсын Гавьяат багш С.Шаарийбуу өнөөдөр Ерөнхий сайд Г.Занданшатарт ханджээ. Тэрээр иргэний хувиар Малайзын шүүхэд хандахад хүндрэлтэй байгааг хэлж, Засгийн газраас дэмжлэг хүссэн байна.

Засгийн газар түүний хүсэлтийг хүлээн авч, асуудлыг шийдвэрлэх зорилгоор ажлын хэсэг байгуулахаар болсон байна. С.Шаарийбуу 21 жилийн турш Малайзын Холбооны шүүхэд өргөдөл гарган, давж заалдсан ч амжилт олоогүйг онцлов.

Тэрбээр Монголын Засгийн газарт анх удаа хандсан бөгөөд асуудлыг шуурхай шийдвэрлэхэд Засгийн газар дэмжлэг үзүүлж байгаад талархал илэрхийлэв. Малайзын шүүхтэй ганцаараа тэмцэхэд хүндрэлтэй байсан ч одоо Засгийн газартай хамтран ажиллах боломж нээгдэж байна.

Ажлын хэсэг Ерөнхий сайдтай хуралдаж, хэрхэн давж заалдах талаар шийдвэр гаргах юм. С.Шаарийбуу Малайз руу явж, Холбооны шүүхэд давж заалдах хүсэлтээ гаргахаар төлөвлөж байна.

Тэрбээр мөнгөний төлөө биш, зөвхөн “Уучлаарай” гэсэн үгийг сонсохыг хүсэж байгаагаа илэрхийлсэн бөгөөд энэ үгийг хэлэх ёстой хүмүүс Австрали, Малайзад байгааг тэмдэглэв.