ByteDance-ийн хиймэл оюуны Seedance 2.0 Холливүүдэд анхаарал татаж байна
ТикТок платформыг эзэмшигч Хятадын технологийн компани ByteDance-ийн хөгжүүлсэн хиймэл оюуны шинэ загвар Seedance 2.0 энэ долоо хоногт Холливүүдэд анхаарал татаж байна.
Seedance 2.0 аппликэйшн нь хэрэглэгчийн текстээр өгсөн зааврын дагуу дууны эффект, харилцан яриа бүхий өндөр чанартай видео дүрс бүтээх чадвартай болсон байна.
Энэхүү технологиор бүтээсэн Spider-Man, Deadpool зэрэг алдартай кино дүрүүдийн видео бичлэгүүд олон хүний сонирхлыг татаж байна.
Seedance-ийн анхны хувилбар 2025 оны зургаадугаар сард зах зээлд нэвтэрсэн ч онцгой анхаарал татаж байгаагүй бол хоёр дахь хувилбар нь найман сарын дараа илүү их дуулиан тарьжээ.
Videostate студийн Ян-Виллем Блом хэлэхдээ, “Анх удаагаа би хиймэл оюуны тусламжтайгаар жинхэнэ кино үйлдвэрлэлийн эцсийн бүтээгдэхүүн гаргаж байгааг харлаа” гэжээ.
Өрнөдийн ижил төстэй системүүд хэрэглэгчийн өгсөн зааврын дагуу видео дүрс үүсгэж байгаа ч Seedance нь текст, дүрс, аудиог нэгтгэсэн өндөр чанартай бүтээгдэхүүн гаргаж байгаагаараа онцлогтой гэж AI ёс зүй судлаач Маргарет Митчелл тэмдэглэжээ.
Гэсэн хэдий ч Seedance-ийн видео бүтээлүүдэд ашигласан оюуны өмчийн хуулиар хамгаалагдсан дүрүүдтэй холбоотой маргаан үүсчээ.
Холливүүдийн Disney, Paramount зэрэг студиуд ByteDance компаниас Spider-Man, Darth Vader зэрэг дүрүүдийг видео бичлэгт ашиглахгүй байхыг шаардсан байна.
Японы компаниуд мөн анимэ дүрүүдийг ашигласан видео бичлэгүүд тарсны дараа ByteDance-ийн оюуны өмчийн хууль зөрчсөн эсэхийг шалгаж эхэлжээ.
ByteDance компани оюуны өмчийн хамгаалалтаа сайжруулах арга хэмжээ авч байгаагаа мэдэгдсэн байна.
Өмнө нь OpenAI компанитай холбоотой ижил асуудал үүсэхэд Disney компани дүрүүдээ Sora платформд ашиглах эрхийг нэг тэрбум ам.доллараар зарж байв.
Жижиг компаниуд Seedance-ийг боломж гэж харж байна. Тухайлбал, Сингапурын Tiny Island Production компанийн Квок хиймэл оюуны системүүд бага зардлаар томоохон кино бүтээх боломж олгож байгааг онцолжээ.
Ази тивд хиймэл оюуны тусламжтайгаар бүтээсэн бичил драмууд олноор гарч байгаа бөгөөд нэг бүтээл ойролцоогоор 140,000 ам.долларын зардалтай байна.
Романс, гэр бүлийн драмууд видео эффект бага ашигладаг тул үүнээс ч бага өртгөөр бүтдэг гэжээ.
Seedance нь Хятадын хиймэл оюуны хөгжлийн нэгэн жишээ болж байна. Өнгөрсөн жил DeepSeek хиймэл оюуны загвар бага зардлаар бүтэж дэлхий даяар анхаарал татаж байв.
Мөн энэ долоо хоногт Хаврын баярын гала концерт дээр Хятадын робот технологийн хөгжил дэлхий нийтэд танилцуулагдсан.
Судлаач Билл Бишопын таамгаар 2026 он Хятадад хиймэл оюуныг массын хэрэглээнд нэвтрүүлэх эргэлтийн жил болох төлөвтэй байна.