Осака хотод нэрээ нууцалсан иргэн 3.6 сая ам.долларын алт хандивлав

Японы Осака хотод нэрээ нууцалсан иргэн 21 килограмм жинтэй алтан гулдмайг хандивлаж, хуучирсан ус хангамжийн шугам сүлжээг шинэчлэхэд дэмжлэг үзүүлжээ. Алтны нийт үнэ ойролцоогоор 560 сая иен буюу 3.6 сая ам.долларт хүрч байна.

Энэхүү алтны хандивыг өнгөрсөн оны арваннэгдүгээр сард хотын захиргаанд гардуулсан бөгөөд энэ талаар Осака хотын дарга Хидэюки Ёкояма пүрэв гарагт хийсэн хэвлэлийн бага хурлын үеэр мэдээлсэн байна. Тэрээр хуучирсан усны хоолойг шинэчлэхэд их хэмжээний хөрөнгө шаардлагатай тул ийм томоохон хандивт талархаж байгаагаа илэрхийлжээ.

Осака хот нь Японы Кансай бүсийн худалдаа, эдийн засгийн чухал төв бөгөөд улсын гурав дахь том хот юм. Гэвч тус хотын ус, бохирын шугам сүлжээ олон арван жилийн настай болж, элэгдэж муудсан нь аюулгүй байдлын эрсдэл үүсгэж байна.

Хотын Ус хангамжийн газрын мэдээлснээр 2024 оны санхүүгийн жилд зам доорх усны хоолой задарсан 90 гаруй тохиолдол бүртгэгдсэн байна. Улсын хэмжээнд Японы усны шугам хоолойн 20 гаруй хувь нь хуульд заасан 40 жилийн ашиглалтын хугацаагаа давсан гэж орон нутгийн хэвлэлүүд мэдээлжээ.

Сүүлийн жилүүдэд бохирын шугамын хуучралтаас үүдэлтэй хөрс цөмрөх үзэгдэл нэмэгдэж байгаа бөгөөд өнгөрсөн жил Сайтама мужид үүссэн томоохон хөрс цөмрөлтийн улмаас ачааны машин осолдож, жолооч амиа алдаж байв. Албаныхны үзэж буйгаар уг осол бохирын шугам хагарсантай холбоотой байжээ.

Энэхүү ослын дараа Японы эрх баригчид улс даяар зэвэрч муудсан хоолойнуудыг солих ажлыг эрчимжүүлэхээр болсон ч төсвийн хүндрэл шинэчлэлийн ажлыг удаашруулж байна.

Хотын Ус хангамжийн газар алтны хандивыг усны шугамыг сайжруулах, дэд бүтцийг шинэчлэхэд зарцуулахаа мэдэгдсэн бөгөөд уг нэрээ нууцалсан хандивлагч өмнө нь хотын ус хангамжийн салбарт 500 мянган иений бэлэн мөнгө хандивлаж байжээ.