Их Британийн эрх баригч Консерватив намын даргаар Гадаад хэргийн сайд асан Борис Жонсон олонхийн саналыг авч сонгогдсон байна. Ийнхүү тэрбээр Тереза Мэйг залгамжилж тус улсын Ерөнхий сайдаар томилогдохоор болж байгаа юм.
Британийг Европын Холбооноос гаргах Брекситийн гол төлөөлөгч гэгддэг Борис Жонсон тус намын 160 гаруй мянган гишүүдийн дунд явуулсан санал хураалтаар 92 мянган хүний саналыг авч тэргүүлсэн байна. Түүний гол өрсөлдөгч байсан Жереми Хант 46 мянган хүний саналыг авчээ. Санал хураалт 87,4 хувийн ирцтэй байсан аж. Түүний гол амлалт аравдугаар сарын 31 гэхэд Британийг Европын холбооноос гаргах юм.
Харин одоогийн Ерөнхий сайд Тереза Мэй өнөөдөр /2019.07.24/ албан ёсоор суудлаасаа бууж, ажлаа хүлээлгэн өгөх аж.
Борис Жонсон санал асуулгад тэргүүлэх нь тодорхой болоход тус улсын Гадаад хэргийн сайд Алан Дункан огцорч буйгаа мэдэгдсэн бол Сангийн сайд Филип Хаммонд, Хууль зүйн сайд Дэвид Гауке нар Борис Жонсоныг сонгогдвол албан тушаалаасаа огцорно гэдгээ илэрхийлсэн.
АНУ-ын Ерөнхийлөгч Дональд Трамп түүнд баяр хүргэхдээ “Маш сайн хүн Британийн дараагийн Ерөнхий сайд болохоор боллоо. Тэр Брекситийг амжилттай дуусгаж чадна. Британичууд түүнийг Британийн Трамп гэж дууддаг гэсэн. Энэ үнэхээр сайхан санагдаж байна” хэмээн хэлсэн байна.
Мөн АНУ-ын Ерөнхийлөгчийн охин бөгөөд Ерөнхийлөгчийн зөвлөх Иванка Трамп Борист баяр хүргэн твиттертээ жиргэсэн нь олны анхаарлыг ихэд татсан юм. Учир нь тэрбээр мэндчилгээн дээрээ “Нэгдсэн Вант Улсын дараагийн Ерөнхий сайдаар сонгогдсонд баяр хүргэе” хэмээн бичихдээ “United Kingdom” буюу Нэгдсэн Вант Улсгэдэг үгийг “United Kingston” хэмээн алдаатай бичсэн байсан аж. Хэсэг хугацааны дараа хатагтай Трамп жиргээгээ устгаад, үгийн алдаагаа засан дахин жиргэсэн байна.
Эх сурвалж: BBC
