Өнгөрсөн 10-ны өдрийн өглөө 06:00 цагийн үед Кёнг Ги мужийн Күри хотын нэгэн айл нүүлгэлт, хадгаламжийн газрын контейнер дотроос “Сайн байна уу?”, “Өглөөний мэнд” гэх үл мэдэх гадаад үгийг сонсоод гайхан асуутал уг газраас ажилд гарахаар ирсэн 8 хүний 3 нь Монгол хүн болохыг мэдсэн бөгөөд тэдний хоорондоо мэндэлсэн мэндийн үг болохыг ч мэдлээ.
Тус газрыг хариуцсан ахлах ажилтан Ким “Сүүлийн үед биеийн хүч шаарддаг айл нүүлгэлтийн ажилд залуу Солонгос хүмүүс ул мөргүй алга болсон” гээд “Монголчууд хүч тэнхээ сайтайн дээр Солонгос хүнтэй ижил төрхтэй болохоор тэднийг ажиллуулдаггүй айл нүүлгэлтийн газрыг олоход бэрх болсон” гэж хэлжээ.
Өмнөд Солонгост өнөөгийн байдлаар албан ёсоор ажил хийх эрх бүхий визтэй 1.1 сая гадаадын иргэн бүртгэлтэй байдаг ба түүн дээр хууль бусаар оршин суудаг 350 000 гадаадын иргэнийг нэмбэл нийтдээ 1.45 сая гадаадын иргэн тус улсад ажиллаж амьдарч байна гэсэн тооцоо гарчээ.
Энэ нь 10 жилийн өмнөх үетэй харьцуулбал даруй 2 дахин өссөн үзүүлэлт бөгөөд өнгөрсөн жилийн 7 сараас хойш хууль бусаар 1 жил хүртэл хугацаагаар оршин сууж буй хууль бус гадаадын иргэний тоо 130 000-д хүрсэн гэсэн үзүүлэлт гарсан байна.
Өмнөд Солонгосын Жижиг дунд үйлдвэрлэл/ЖДҮ/-ийн айл нүүлгэлт, хоолны газар, барилга, асрамжийн арчилгаа сувилгаа, газар тариалан зэрэг салбарт ажиллах хүчний хомсдол үүссэн нь тэдний дунд 3D ажил гэдэг нэршлийг үүсгэжээ. 3D гэдэг нь ХЭЦҮҮ, ХҮНД, АЮУЛТАЙ нөхцлүүд зэрэг бүрдсэн ажлын байрыг нэрлэдэг бөгөөд үүнд юуны түрүүнд айл нүүлгэлт, хоолны газар, барилга, газар тариалангийн ажлууд багтдаг байна.
Сөүлийн нэгэн хоолны газрын эзэн “Үйлчлүүлэгчээс захиалга авах, зөөх ажлыг нутгийн иргэд хийдэг бөгөөд гал тогооны бэрх ажлуудыг гадаадын хүнээр хийлгэдэг нь үнэн” гээд “3D ажлын дийлэнхийг гадаадын ажилчид хариуцдаг гэж үзэхэд болно” хэмээн хэлжээ.
Мөн Сөүлийн Санг Ил Донг дахь нэгэн барилгын талбайд уулзсан 50 гаран насны Солонгос ажилчин “Өнөөгийн байдлаар 20-30 насны гадаад залуучууд барилгын салбарт хүчтэй түрэн орж ирснээр 50-60 насны Солонгос иргэд тэдний гарын аяыг даах итгэл үнэмшилгүй болж байна” гээд “Өөрийн нутаг дээрээ гадаадын иргэдэд ажлын байраа алдана гэдэг байж боломгүй хэрэг” гэсэн байна.
Солонгосын хөдөлмөрчдийн холбоо болон Ардчилсан хөдөлмөрчдийн холбооноос удаа дараа “Хууль бус гадаадын иргэдийг шахан зайлуулъя” гэсэн уриагаар тэмцлээ илэрхийлж буй боловч сүүлийн жилүүдэд өндөр хөгжилтэй Европын улс болох Англи, Герман зэрэг улсаас тус улсыг зорин ирж ажиллаж эхэлсэн байна.
Судлаачид энэхүү асуудалд тус улсын засгийн газрыг цалингийн доод хэмжээ,ажлын цагийг нарийвчлан тогтоож өгөхөөс гадна юуны түрүүнд гадаадын иргэдийг ажиллуулах хуулийн зохицуулалт шаардлагатай байгааг дурьджээ.
ЖДҮ-ийн судлаач Ну Мин Сон “3D ажилд гадаадын иргэд ажиллахгүй бол үйл ажиллагаа нь зогсох хүртлээ яригдаж буй энэхүү асуудалд ямар нэгэн санаа тавин гарц гаргах цаг нь болжээ” гэж хэлжээ.
Эх сурвалж: Mglradio
