Онцлох мэдээУлс төр

Их хэмжээний мөнгө цацсан эсэргүүцлийн жагсаал

Ардчилсан намаас Сүхбаатарын талбайд эсэргүүцлийн жагсаалыг өнөөдөр (2019.05.30) зохион байгууллаа. Ажиглагчдын үзэж байгаагаар энэ жагсаалд АН дүүргийн намын хороодын ажилтнуудаа зохион байгуулалттайгаар нэлээд түлхүү татан оролцуулжээ.

Жагсаалын ерөнхий дүр зургаас ажихад, энэ удаагийн жагсаалд маш их хөрөнгө зарсан нь тод харагдаж байлаа. Тухайлбал, анонсоос гадна эрх баригчдын дүр бүхий маскууд, тэдний хэвлэлмэл зургууд, маш их ур гаргаж хийсэн хиймэл хүмүүсийн дүр гээд дурдвал их хэмжээний мөнгө зарсан олон зүйлийг жагсаалдаа ашиглажээ. Энэ бүхэн дараа нь хог дээр хэвтэнэ гэдэг л хайран.

Жагсагчид мах, бензиний үнэ тэнгэрт хадаж, сурагчид сүрьеэ өвчинд нирвэгдэж, иргэдийн амьдрал тартагтаа тулж, яс буцалгаж өл залгуулж байна хэмээн хариуцлага нэхэх сөрөг хүчний жагсаалд нэгдэж буйгаа илэрхийлж байв.

Мөн Төв цэвэрлэх байгууламжид дөрвөн иргэн, Налайхын уурхайд гурван иргэн төрийн хариуцлагагүй байдлаас болж амиа алдсаныг жагсагчид нэхэн санууллаа. Нэг жилийн дотор нийслэлд авто замын ослоор 45 хүүхэд хорвоог орхиж, халдварт өвчний эрсдэл дунд амьдарч байгаа зэрэг олон асуудлыг дурдаж буй тэд “ёс зүйгүй УИХ тарж, чадваргүй Засгийн газрыг нэн даруй огцрохыг шаардаж байна” гэсэн нэг шаардлага дор нэгджээ. Шаардлага, зорилго нь тов тодорхой энэ жагсаалд зарцуулсан тэр зардлаа арай бодит зүйлд ашигласан бол АН илүү “очков” авах байсан болов уу гэх бодол хэн хүнд төрсөн нь лавтай.

Эсэргүүцлийн жагсаал зохион байгуулсан АН-ын зүгээс УИХ-ын даргад хүргүүлсэн шаардлагыг бүрэн эхээр нь хүргэе.

МОНГОЛ УЛСЫН ИХ ХУРЛЫН ДАРГА ГОМБОЖАВЫН ЗАНДАНШАТАР ТАНАА

Шаардлага хүргүүлэх тухай

Монголчууд бидний ардчилалаар олсон ололт амжилтыг үгүйсгэж, тусгаар Монгол Улсын улс төр, эдийн засаг, гадаад бодлогын тулгууруудыг ганхуулж, төрийн эрх мэдэл хуваарилалтын зааг уялдааг алдагдуулан зөрчилдүүлж, Үндсэн хууль, хуульт ёсыг үгүйсгэн, өөрсдийн хувийн дур зорго, гэр бүлжсэн явцуу ашиг сонирхол, хоорондын өс хонзон, фракц бүлгийнхээ албан тушаалын төлөөх тэмцэлд ард нийтийг айдас бухимдалд автуулж, Монгол хүнийг ядууруулж, Монгол орныг дарангуйлалын зүг хөтлөх санаархал газар авхуулж байгааг Ардчилсан нам эрс эсэргүүцэж байна.

Ардчилалын тулгуур зарчмуудыг устган, уландаа гишгэхийг үл тэвчиж, Парламентын ардчилал, Үндсэн хуулийн суурь зарчим, хүний эрх, хуулийн засаглалыг хамгаалж тэмцэн, хадгалж үлдэх нь Ардчилсан намын үүрэг мөн.

60 тэрбумын гэгдэх авлигаар 65 суудал авсан эрх баригч та бүхний сонгон байгуулсан Засгийн газар Жижиг дунд үйлдвэрлэлийг дэмжих сангийн мөнгөөр Улсын Их Хурлын гишүүдийг хахуульдаж улмаар тэднээр дамжуулан хууль хулгайлах замаар хулгайгаа хариуцлагагүй, худал хуурмагаа үнэн болгож хүчирхийлэл, аллагыг өөгшүүлж ардчилалын үндэс болсон иргэний сонгох сонгогдох эрхийг хүртэл үгүйсгэн дарангуйлалыг тогтоох эхлэлийг тавилаа.

Засгийн газрын худал хийрхэл, амлалт хэрээс хэтэрч сандал суудал булаацалдсан хэрүүл тэмцэл хүний амиар хэмжигдэх хүртлээ хурцдаж байхад төгрөгийн ханш унаж, бензин тос, өргөн хэрэглээний барааны үнэ өсөж, хүнсний аюулгүй байдал алдагдаж, хоолны хордлого болон сүрьеэ өвчин тархлаа. Шоронд ч үгүй болсон өвчин сургууль эзэлж буй нь төр засгийн хариуцлага ямар хэмжээнд унасаныг шууд илтгэх биз ээ.

Иймд Улсын Их Хурлын дарга танд авлига хариуцлагагүй байдал нүүрэлсэн Засгийн газрыг дараах үндэслэлээр нэн даруй огцоруулах шаардлагыг хүргүүлж байна.

Нэгэн зүйл. Иргэд, жижиг, дунд үйлдвэр эрхлэгчдийн боломжийг хулгайлж, албан тушаалаа урвуулан нэн хөнгөлөлттэй нөхцөлөөр, их хэмжээний мөнгийг Засгийн газрын гишүүд болон Улсын Их Хурлын гишүүд, тэдгээрийн хамаарал бүхий этгээдүүдэд зохион байгуулалттайгаар тарааж, хахуульдсан.

Жич: Ийм олноороо мал адил сүрэглэн, хувийн шуналдаа өөрсдөө хээлтэн, хахуульдуулсан хууль тогтоогчид Монгол Улсын түүхэнд урд өмнө байсангүй.

Нэгэн зүйл. Олон сая долларын авлигад өртсөн сайдуудын тухай яриа өгүүлэл гадна дотноос ирдэг боллоо. УИХ-ын нэр бүхий гишүүд тодорхой тоо, дүнтэйгээр эдгээр авлигын тухай ил тод хэлж байна. Яам, агентлагуудад үйлдэл дээрээ баригдсан авлигын хэргүүд ээлж дараалан гарлаа. Тэдний цефнээс хураагдсан авлигын мөнгө нэг хүн байтугай нэг хэсэг хүн дарж алах хэмжээнд хүрсэн байна. Гэтэл авлигачид хөөн хэлэлцэх хугацаа дууссан гэх үндэслэлээр суллагдаж эхэллээ. Ингэж суллагдах авлигачдын цуваа УИХ, Засгийн газраар дүүрэн байна. Гэмт хэрэгтэй тэмцэх Үндсэн хуульд заасан үүргээ Засгийн газар биелүүлэх бус өөрсдөө гэмт хэрэг үйлдэж, гэмт хэрэгтнүүдийг хаацайлдаг болсныг хууль зүйн сайдаас авхуулаад олон сайд дарга нарын үйлдэл, ярианаас харж байна. Төрийг төгрөгөөр олигархуудад зардаг байсан 60 тэр бумын авлигчид, дүрээ өөрчлөөд улсыг доллароор гадныханд худалддаг болсон юм биш үү!

Нэгэн зүйл. Үндсэн хууль, бусад хуулийн биелэлтийг улс даяар зохион байгуулж хангах үүрэгтэй Засгийн газрыг толгойлж, төрийн хууль биелүүлэх ажлыг УИХ-ын өмнө дангаараа хариуцдаг Ерөнхий сайд, УИХ-д хэт олонхи болсон эрх баригч намын дарга нь иргэдийнхээ сонгох, сонгогдох эрхийг Үндсэн хуулийн манаачтай хамсаад хулгайлдаг явдал хоёр жил дараалан гарлаа. Давтан үйлдэгдсэн энэ гэмт үйлдэл, сонгуулиас айдаг улс төрч, ордны хуувилдаан, томилгооны эрх мэдлээр дамжин Үндсэн хуулийг хэрхэн хулгайлж, сонгогчдыг сонгох эрхгүй болгож болдгийг харууллаа.

Нэгэн зүйл. Эрх мэдэл, хулгайн мөнгөндөө сагасан эрх баригчдын архидалт яам тамгын газрыг байтугай улс орныг хөлчүүрхүүлж байна. Том дуутай, сүр ихтэй сайд дарга нар албатуудынхаа өрөө тасалгаанд архи хайж нэгжлэг хийж шоудахаас илүүтэй даргадаа эрэмшсэн тавиулуудынхаа толгой дотор архиа, авлига хоёроо хайх цаг болж. Тэдний чинь агсан согтуу хэтэрээд хүний амиар шараа тайлдаг боллоо. Яам, агентлагт хүн алдаг байснаа болиод одоо төрийн ордонд хүн үхүүлдэг боллоо.

Нэгэн зүйл. Салбар бүрт хүний амь эрсдэж байна. Амь эрсдсэн учирал бүрийн ард албан тушаалтны хариуцлаггүй байдал илэрч байна. Цэвэрлэх байгууламж, уурхай, цэрэг, цагдаа гээд үхэл дагуулсан дарга нарын хариуцлаггүй байдал У.Хүрэлсүхийн засгийн газрын ажлын тайлан мэт харагдах боллоо. Хариуцлага ярьж засгаа унагасан улс төрчид хариуцлагаа мартаад хүнээ үхүүлсээр байх уу? Үхэхээс айхгүй Ерөнхий сайд, үхүүлэхээс айхгүй сайдууддаа хэзээ хариуцлагын сэлмээ гаргаж үзүүлэх вэ? Хэлэхэд муухай ч хэлэхээс өөр аргагүй үг байна. Иргэд гадуур Хүрэлсүхийн Засгийн газар үхэл дагуулсан Засгийн газар боллоо гэж ярьцгааж байна шүү.

Нэгэн зүйл. Ард түмнийхээ төлөө махаа барж, ясаа цайтал зүтгэж буй сайдуудын буянаар ард түмэн чинь махны бараа харахаа болиод хоосон яс чанах дээрээ туллаа. Сайд дарга нараа төгрөгийн ханш хоолонд хүрэхгүй болсныг мэдээд та бүхэн минь доллароор цалинждаг болоо юу. Дарга нарт гологдсон тэр төгрөг чинь үнийн өсөлтөөс болоод иргэддээ ч тогтохоо болилоо. Ерөнхий сайд Хүрэлсүхийн “Би ард түмнээ өмгөөлдөг, авлигачидтай хатуу тэмцдэг Ерөнхий сайд байхыг хүсч байна” гэх алдарт үг цуурай төдий үг байв уу. Үнийн өсөлт халаасны хулгайч шиг л иргэдийн халаасыг хоослоод эргүүлчихлээ.

Дарга нарын том тэрэг шатахуунаар бялхаж, эхнэр хүүхдийг нь зөөж байхад

Жирийн иргэд пруссээ түрэх нь холгүй мөлхөж байна.

Гишүүд нь 3 хувийн зээл хувааж идэж байхад

Иргэд нь 30 хувийн зээлд дарлуулж байна

Яамдын өрөөгөөр авлига тэнүүлчилж байхад

Сургуулийн танхимд сүрьеэ орогнож байна

Сайд дарга нар сархадаа хэтрүүлж, биеэ сувилуулж явахад

Салбарт нь хүн үхэж байна

Хэдий болтол мангас ярьж, иргэдээ мангасаар айлган өөрсдөө мангас болж суух вэ, эрх баригчидаа!

Архидалттай, аллагатай, авлигатай, айдастай У.Хүрэлсүхийн Засгийн газарт хариуцлага тооцон нэн яаралтай огцруулахыг шаардаж байна.

АРДЧИЛСАН НАМ
2019.05.30

61276629_2248010071954671_624601292672598016_n Их хэмжээний мөнгө цацсан эсэргүүцлийн жагсаал

61286399_2248010011954677_417176104810315776_n Их хэмжээний мөнгө цацсан эсэргүүцлийн жагсаал

61288826_2248010258621319_7215695488509542400_n Их хэмжээний мөнгө цацсан эсэргүүцлийн жагсаал

61289640_2248010498621295_1886742355327844352_n Их хэмжээний мөнгө цацсан эсэргүүцлийн жагсаал

61292170_2248010138621331_8071835633431085056_n Их хэмжээний мөнгө цацсан эсэргүүцлийн жагсаал

61315659_2248009808621364_6275059275152752640_n Их хэмжээний мөнгө цацсан эсэргүүцлийн жагсаал

61498869_2248009838621361_8223345548304842752_n Их хэмжээний мөнгө цацсан эсэргүүцлийн жагсаал

61510647_2248010668621278_551179629906362368_n Их хэмжээний мөнгө цацсан эсэргүүцлийн жагсаал

61514301_2248010195287992_6449234131879460864_n Их хэмжээний мөнгө цацсан эсэргүүцлийн жагсаал

61524343_2248010731954605_5714457912928108544_n Их хэмжээний мөнгө цацсан эсэргүүцлийн жагсаал

61542636_2248010311954647_5697114220806537216_n Их хэмжээний мөнгө цацсан эсэргүүцлийн жагсаал

61543266_2248009671954711_7460640140575113216_n Их хэмжээний мөнгө цацсан эсэргүүцлийн жагсаал

61546629_2248009771954701_2853972168662843392_n Их хэмжээний мөнгө цацсан эсэргүүцлийн жагсаал

61621585_2248009645288047_3242001414221725696_n Их хэмжээний мөнгө цацсан эсэргүүцлийн жагсаал

61621995_2248009921954686_2089655847549403136_n Их хэмжээний мөнгө цацсан эсэргүүцлийн жагсаал

61678131_2248010288621316_292771737131548672_n Их хэмжээний мөнгө цацсан эсэргүүцлийн жагсаал

61683556_2248010478621297_3774562721677180928_n Их хэмжээний мөнгө цацсан эсэргүүцлийн жагсаал

61690088_2248010078621337_792392127190401024_n Их хэмжээний мөнгө цацсан эсэргүүцлийн жагсаал

61698997_2248010341954644_5748365674707681280_n Их хэмжээний мөнгө цацсан эсэргүүцлийн жагсаал

61756569_2248010391954639_5210081894560956416_n Их хэмжээний мөнгө цацсан эсэргүүцлийн жагсаал

61771774_2248009965288015_2783693245136240640_n Их хэмжээний мөнгө цацсан эсэргүүцлийн жагсаал

61789451_2248010708621274_5094127174957400064_n Их хэмжээний мөнгө цацсан эсэргүүцлийн жагсаал

61821006_2248010835287928_4048018234236993536_n Их хэмжээний мөнгө цацсан эсэргүүцлийн жагсаал

61907569_2248010415287970_4479769349220990976_n Их хэмжээний мөнгө цацсан эсэргүүцлийн жагсаал

61924939_2248010568621288_8740514912742146048_n Их хэмжээний мөнгө цацсан эсэргүүцлийн жагсаал

61948273_2248009705288041_6937377261221838848_n Их хэмжээний мөнгө цацсан эсэргүүцлийн жагсаал

61957189_2248010205287991_5522129913068388352_n Их хэмжээний мөнгө цацсан эсэргүүцлийн жагсаал

ХОЛБООТОЙ МЭДЭЭ

1 сэтгэгдэлтэй

  1. Манай хамаатны дүү ѳчигдѳр ярьж байсан 1 хүний 10000 тѳгрѳг ѳгнѳ та ирэхгүй юм уу ѳѳр дахиад хүн байвал аваад ирээрэй гээд. Бодит байдал дээр ийм л байна.

Сэтгэгдэл

Таны сэтгэгдэл

Back to top button
Close