Боловсрол

Элсэлтийн босго оноог өнгөрсөн оныхоор нь байлгахыг БСШУС-ын сайдаас хүсчээ

 Боловсрол, соёл, шинжлэх ухаан, спортын сайд Ё.Баатарбилэг хувийн их, дээд сургуулиудын холбоо (ХИДСХ)-ны Удирдах зөвлөлийн гишүүдтэй уулзжээ.

Монгол Улсын хэмжээнд төрийн бус өмчийн 72 их, дээд сургууль байдгаас 40 гаруй нь ХИДСХ-ны гишүүн юм. Өнгөрөгч сарын сүүлээр төрийн бус өмчийн 39 их, дээд сургуулийн удирдлагыг хүлээн авч уулзах үеэрээ сайд Ё.Баатарбилэг “Зөвхөн өөрийн сургуулийн бэрхшээлийг ярихгүйгээр Монгол Улсын дээд боловсролын тогтолцоог өргөн хүрээнд харж, нэгдсэн санал танилцуулах” чиглэлийг өгсөн билээ. Уулзалтын эхэнд ХИДСХ-ны Ерөнхийлөгч Б.Эрдэнэсүрэн төрийн бус өмчийн их, дээд сургуулиудаас салбарын яаманд тавьж буй саналуудаа уламжлав.

5a8ce4_edcfb7fa-8fe1-4a70-8ce4-0d74883552a4_x974 Элсэлтийн босго оноог өнгөрсөн оныхоор нь байлгахыг БСШУС-ын сайдаас хүсчээ

Тухайлбал, Ерөнхий боловсролын ахлах сургуулийг төрөлжүүлэн хөгжүүлэх эрх зүйн орчин бий болгох, багш нарын мэргэжлийг дээшлүүлэхэд төрөөс дэмжих, сургалтын агуулгын стандарт бий болгох зэрэг саналуудыг хэллээ. Мөн элсэлтийн ерөнхий шалгалтын босго оноог өнгөрсөн оныхоор нь байлгах, салбарын бодлогод хувийн сургуулиудын асуудлыг тусгуулж ажиллахын тулд Сайдын зөвлөлд тус холбооноос төлөөлөл багтааж өгөхийг хүслээ.

БСШУС-ын сайд Ё.Баатарбилэг эдгээр асуудлыг судалж, анхаарч ажиллахаа илэрхийлээд сургуулиудын үйл ажиллагаанд чанарын хяналт тогтмол тавина. Хангалтгүй байгаа сургуулийн тусгай зөвшөөрлийг цуцлах, хугацаатай үүрэг даалгавар өгөх зэргээр шаардлага тавьж ажиллана гэлээ. Уулзалт Этүгэн их сургуулийн хичээлийн байранд болсон бөгөөд энэ үеэр тус сургууль БСШУС-ын сайд болон хувийн сургуулиудын удирдлагад Сувилахуйн болон нүүр ам судлалын ур чадварын төв, Номын сан, Спорт заалаа үзүүлж, үр дүнд чиглэсэн хөтөлбөрийн шинэчлэл, програмаа танилцуулсан юм.

 

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close