Нийслэлийн прокурорын газраас энэ оны 11-12 дугаар сард Хар тамхи мансууруулах бодистой холбоотой 23 хэргийг шүүхэд шилжүүлжээ. Мөн авлига, албан тушаал, Хүрээлэн буй орчны эсрэг, Гэр бүлийн хүчирхийлэл, бусдыг алах, залилах, бага насны хүүхдийг хулгайлах, улсын хилээр хязгаарласан, хориглосон барааг хууль бусаар нэвтрүүлэх зэрэг Эрүүгийн хуульд заагдсан нийтдээ 44 хэрэгт прокурорын яллах дүгнэлт үйлдэж, шүүхэд шилжүүлсэн байна. Тухайлбал:
1. Н.Мөнхбат нь Хөгжлийн банкны гүйцэтгэх захирлаар ажиллаж байхдаа албан үүрэг, албан тушаалын байдлаа урвуулан ашиглаж, тус банкин дахь чөлөөт мөнгөн хөрөнгийг арилжааны банкинд хугацаатай байршуулах үйл ажиллагааг бие даан шийдвэрлэж, буцаан татах шаардлагагүй арилжааны банкуудад байршуулсан мөнгөн хадгаламжийг хугацааны өмнө буцаан татсанаас хүүгийн орлогыг алдагдуулж, Хөгжлийн банкинд их хэмжээний хохирол учруулсан, мөн “Мон лаа“ ХХК-ийн ерөнхий захирал М.Энхсайханд давуу байдал олгосон гэх эрүүгийн хэргийг;
2. Нийслэлийн хот төлөвлөлт, ерөнхий төлөвлөгөөний газарт Барилга, байгууламжийн хяналтын хэлтсийн даргаар ажиллаж байсан Т.Эрдэнэтуяа нь албан үүрэг, бүрэн эрх, албан тушаалын байдлаа урвуулан ашиглаж, барилгын ажлын зөвшөөрлийн гэрчилгээг олгож, “Монос групп” ХХК, түүний охин компани болох “Монос констракшн” ХХК-нд давуу байдал бий болгосон гэх хэргийг;
3. Н.Раднаасэд нь Нийслэлийн өмчийн харилцааны газрын Өмчийн хяналт шинжилгээ, үнэлгээний хэлтсийн ахлах мэргэжилтнээр ажиллаж байхдаа тус газрын Захиргаа, санхүүгийн хэлтсийн түрээсийн байр ашиглалт хариуцсан мэргэжилтнээр ажиллаж байсан Д.Нэмэхбаяртай бүлэглэн албаны чиг үүргээ хэрэгжүүлээгүйн хариуд бусдаас хахууль авсан гэх хэргийг;
4. Тээврийн цагдаагийн албаны Мөрдөн шалгах газрын ахлах мөрдөгч ажилтай Отгон нь албаны чиг үүргээ хэрэгжүүлээгүйн хариуд бусдаас хахууль авсан гэх хэргийг;
5. Хан-Уул дүүргийн нутаг дэвсгэрт 2018 оны 01 дүгээр сард БНХАУ-ын иргэн Ян Шухон нь өөртөө давуу байдал бий болгох зорилгоор албан тушаалын байдалтай нь холбогдуулан бусдад хахууль өгөхийг завдсан гэх хэргийг;
6. Д.Бат-Ирээдүй, Б.Гүррагчаа нар нь бүлэглэн олон удаагийн үйлдлээр бусдын эд хөрөнгийг залилан мэхэлсэн, Д.Мөнхтогтох нар нь Байгаль орчин, ногоон хөгжил, аялал жуулчлалын яамнаас олгодог байгалийн ургамал, ойн дагалдах баялаг тэдгээрийн гаралтай түүхий эд бүтээгдэхүүн болох самрын идээг гадаадад гаргах зөвшөөрлийн гэрчилгээг хуурамчаар үйлдэж, ашиглан, самрын идээг Дорноговь аймгийн Замын-Үүд сум дахь гаалийн шалган нэвтрүүлэх боомтоор хууль бусаар нэвтрүүлсэн, Д.Ганболд, С.Ариунзаяа нар нь хуулийн байгууллагаас битүүмжлэн, итгэмжлэн хариуцуулж хүлээлгэн өгсөн 133 тонн хуш модны самрын идээг санаатай үрэгдүүлсэн гэх хэргийг;
7. “Зам тээвэр, хөгжлийн яамны Төрийн захиргааны удирдлагын газрын дарга Б.Махбал 2018 оны 08 дугаар сард архи согтууруулах ундааны зүйл хэрэглэсэн үедээ Сүхбаатар дүүргийн нутаг дэвсгэрт тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнтэй маргаж, түүнийг зодож, алсан гэх хэргийг;
8. Баянгол дүүргийн нутаг дэвсгэрт 2018 оны 3 дугаар сард Д.Төмөрбаатар нь В.Гантулгыг хутгалж, эрүүл мэндэд нь хөнгөн хохирол учруулсан, мөн эхнэр О.Чулуунцацралыг хутгалж алсан гэх хэргийг;
9. Дархан-Уул аймгийн нутаг дэвсгэрт 2018 оны 8 дугаар сард П.Батсуурь нь хашааны гадна тоглож байсан 5 настай Э-г хуурч мэхлэн авч явж, хулгайлсан гэх хэргийг;
10. Сонгинохайрхан дүүргийн нутаг дэвсгэрт 2018 оны 6 дугаар сард Отгон-Эрдэнэ нь 5 хоногтой нярай хүүхдийг “салхилуулна” гэж хуурч авч явж, хулгайлсан гэх эрүүгийн хэргүүдийг гэм буруугийн асуудлыг шийдвэрлүүлэхээр харьяалах шүүхэд шилжүүлжээ.
Эх сурвалж: www.prokuror.mn
1 comment
Прокуроруудын ажлын ачаалал үнэхээр их байна. Бүтэц орон тоо нь 90 оны л хэвээр хэргийн өнгө, цараа 100 дахин нэмэгдсэн ажлын үр дүн шаардах үнэхээр хэцүү бна.Гэтэл зүтгээд л бдаг