У.Хүрэлсүхийн Засгийн газрыг авч үлдэхийг дэмжсэн гишүүддээ АН хариуцлага тооцно гэв

У.Хүрэлсүхийн Засгийг зарыг огцруулах тухай асуудалд АН шийдвэр гаргаж, огцруулахыг дэмжиж буй. Харин Ж.Батзандад, Л.Болд гишүүд Засгийн газрыг авч үлдэх талд байр суурьтай байгаа гэдгээ хэлж байгаа. Өнөөдрийн чуулганы хуралдаанд Ж.Батзандан гишүүн хэлсэн үгэндээ “Ерөнхий сайд таны хэлж байгаа Монголын төрд их цэвэрлэгээ хийнэ гэдэг үг надад их таалагдаж байгаа юм. Монголын төрийн идээ бээрийг шахна гэж та зоригтой хэлж чадаад байгаа юм. Энэ надад их таалагдаж байгаа. Энэ утгаар чинь би танай Засгийн газрыг дэмжих талдаа байгаа гэдгээ хэлье.” гэсэн.

Мөн Л.Болд гишүүн түүнтэй санал нэгтэй байгаа гэдгээ илэрхийлж ирсэн. Харин АН-ын дарга С.Эрдэнээс энэ талаар тодруулж асуусан сэтгүүлчийн асуултад:

-АН-ын улс төрийн зөвлөлийн шийдвэр гарсан. АН Засгийн газрыг огцруулах асуудлыг бүрэн дэмжинэ гэдэг шийдвэрээ гаргасан байгаа. Шийдвэрийг дагаж мөрдөх эсэх нь тухайн хүний асуудал. Нам бол нэгдсэн байр суурьтай байгаа. Дагаж мөрдөхгүй бол дүрмийн хүрээнд хариуцлагаа хүлээнэ гэсэн тайлбарыг хэллээ.