Дэлхийн хамгийн том нүүрс импортлогч БНХАУ эх газрын хилийн боомтууд дээрх нүүрс импортын бүрдүүлэлтээ зогсоох шийдвэр гаргасан талаар мэдээлэл гарч, олон мянган олборлогч, уурхайг цочролд оруулаад байна. Эх сурвалжийн мэдээлж буйгаар БНХАУ-ын талаас нүүрсний импортоо хумих энэхүү шийдвэрээ 2018 импортлох шаардлагатай нүүрсний хэрэглээгээ бүрэн хангасан учраас импортоо хязгаарлаж байна гэж тайлбарлажээ.
БНХАУ-ын Хөгжил шинэчлэлийн хорооны шийдвэрээр энэ оныг дуустал зөвхөн тус улсын дулааны цахилгаан станцын нөөцийн санд зориулсан тусгай зөвшөөрөлтэйгөөр нүүрс импортлох аж. Мөн он дуустал нүүрс импортлохгүй байх шийдвэрийг тус улсын хамгийн том зургаан цахилгаан станцад илүү их хамаарч байгаа юм байна. Нийт 17 сая тонн нөөц бий болсны үндсэнд гаргасан хэмээн мэдээлжээ. Энэхүү шийдвэр нь БНХАУ руу нүүрс экспортолдог Индонез, Австрали, ОХУ, Монгол зэрэг орны экспортод сөргөөр нөлөөлж мэдэхээр байна. БНХАУ-ын хувьд энэ оны аравдугаар сарын байдлаар нийт 250 орчим сая тонн нүүрс импортлоод байгаа аж.
Монгол Улсын хувьд энэ онд нийт 2.5 тэрбум ам.доллар бүхий 31.3 сая тонн кокжсон нүүрсийг БНХАУ-д экспортолжээ. Энэ нь Монгол Улсын экспортын 40 орчим хувийг дангаар эзэлж байгаа юм. Одоогийн байдлаар Гашуунсухайт боомт дээр нүүрсний ачаа тээврийн түгжрэл 180 км-т хүрч, тээвэрлэлт зогсонги байдалд ороод буй юм. Энэ үед БНХАУ-ын талаас нүүрс импортлохгүй болж буй нь байдлыг улам хүндрүүлж мэдэхээр байна.
Түүнчлэн, БНХАУ-ын энэхүү гэнэтийн шийдвэр дэлхийн хамгийн том нүүрс олборлогч Австралийн эдийн засагт хүчтэй нөлөөлж байна. Тухайлбал, БНХАУ-ын Засгийн газраас 2020 оны тавдугаар сарыг дуустал Австралиас нүүрс импортлохгүй байх шийдвэр гаргаад байгаа юм. Өнөөдрийн байдлаар Австралид дулааны нүүрсний ханш 30 гаруй хувиар огцом унаж, 89 ам.доллараас 58 ам.доллар болж буураад байна.
Олон улсын шинжээчид БНХАУ-ын энэхүү шийдвэрийг зөвхөн нөөц бүрдсэнээс бус улс төрийн шинжтэй шийдвэр хэмээн тодорхойлжээ. Тухайлбал, эдийн засагч Ма Венгфенг “Энэ шийдвэр нь Австрали улс АНУ-тай хамтран Шинэ Гвинейд усан цэргийн бааз байгуулах шийдвэрт хүрснийг эсэргүүцсэн байх магадлалтай” хэмээн өгүүлжээ. БНХАУ, АНУ хоёр улсын хооронд энэ оны нэгдүгээр сараас хойш хэдэн арван тэрбум доллараар үнэлэгдэх худалдааны сөргөлдөөн үүсээд байгаа билээ.
Эх сурвалж: ABC, Japantoday, Bloomberg