Алдарт физикч Стивен Хокингийн “Нухацтай асуултад өгөх богино хариулт” ном саяхан Их Британид хэвлэгдэн гарчээ. Түүний бичсэн зүйл эрдэмтдийн төдийгүй жирийн иргэдийг хүртэл цочирдуулсан байна. Тэрээр номондоо генийн сайжруулсан өөрчлөлт бүхий хүн гарч ирэхийг зөгнөжээ. Баян хүмүүс өөрийн ДНХ-г ямар ч хяналтгүй өөрчлөх вий хэмээн С.Хокинг нэлээд түгшиж байсан гэнэ.Ийм нөхцөлд ядуу хүмүүс амьд үлдэхгүй аж.
Генийг засах нь уран зөгнөл биш. Өнөөгийн эрдэмтэд хүний генийг өөрчлөх боломжийг эзэмшсэн нь ойлгомжтой. Гэхдээ одоогийн байдлаар тэр боломж нь хязгаарлагдмал байна. Учир нь сөрөг үр дагаврыг хэн ч хэлж таашгүй. Энэ байдлыг засах нь ердөө цаг хугацааны асуудал бөгөөд үүнд 5-10 жил хангалттай гэнэ. Гагцхүү ёс суртахууны асуудал чухал юм. Нас барахын өмнө Стивен Хокинг энэ аюулаас урьдчилан сэргийлж анхааруулж байжээ. Генээр дамжуулан оюун ухааныг өөрчилж, тэр ч бүү хэл хүний араншинг өөрчилж болно. Энэ бол хүн төрөлхтний сүүлчийн хорхой хүргэсэн зүйл байх болов уу хэмээн үзэж байжээ.
“Супер хүн бий болмогц улс төрийн томоохон асуудлууд гарч ирэх бөгөөд тэр нь “сайжирч” чадаагүй, тиймээс ч өрсөлдөх чадваргүй хүмүүстэй холбоотой байх болно. Тиймээс алга болох, эсвэл чухал үүрэг гүйцэтгэхээ болино. Тэдний оронд өөрсдийгөө байнга сайжруулж байдаг хүмүүс бий болно” хэмээн Стивен Хокинг зөгнөжээ.
Гэхдээ нас бие гүйцсэн хүний генийг нэг ч эрдэмтэн өөрчилж чадахгүй, зөвхөн гэдсэнд байгаа үр хөврөлийг л ингэх боломжтой. Харин өнөөдрийн байдлаар ирээдүйн хүнийг өөрчлөхийг дэлхий дахинаа зарчмын хувьд хориглосон байдаг. Ганцхан Их Британид энэ ажиллагаанд лиценз олгохыг санал болгодог юм байна.
Стивен Хокингийн энэ зөгнөлөөс үүдэн эрдэмтэд хоёр хэсэг болон хуваагджээ. Тэдний нэг хэсэг нь хүний ДНХ-д оролцохыг хориглохыг уриалж байгаа бол 30 жилийн тэртээ ЭХО хүртэл зүй бус зүйл гэж тооцогдож байсныг сануулж байна.
Гэхдээ энэхүү маргаан, магадгүй цаашлаад хүн төрөлхтний хувь заяа судалгаа хийж байгаа хүмүүсийн гар хэр цэвэр байх вэ гэдгээс ихээхэн хамаарах нь тодорхой.
Ихэнх судлаачид нэг санаан дээр нэгдээд байна, -нийгэм өөрийгөө хамгаалж чадна. Жирийн хүн генетикийн лабораторид зүгээр нэг сониуч зандаа хөтлөгдөн орж болдоггүйтэй адил генийг редакторлох технологи олны хүртээл болж чадахгүй гэдэгт найдаж байгаа юм.
Эх сурвалж: Өдрийн сонин
