Нийгэм

“Улсаа аврах ард түмний үндэсний хөдөлгөөн”-ий шаардлагыг УИХ-ын Тамгын газрын дарга Ц.Цолмон хүлээн авлаа.

Улсын Их Хурлын Тамгын газрын Ерөнхий нарийн бичгийн дарга Ц.Цолмон 2018 оны 10-р сарын 05 ний өдөр  “Улсаа аврах ард түмний үндэсний хөдөлгөөн”-ий тэргүүн Б.Жагар, тус хөдөлгөөний Удирдах зөвлөлийн дарга А.Эрдэнэбаяр, Удирдах зөвлөлийн гишүүн Г.Алтанцэцэг, “Эрс шинэчлэл хөдөлгөөн”-ий тэргүүн Б.Энхбат нарыг өөрсдийнх нь хүсэлтээр хүлээн авч уулзлаа.

Энэ оны 6 дугаар сард “Улсаа аврах ард түмний үндэсний хөдөлгөөн”-өөс УИХ-ын дарга М.Энхболдод Оюутолгойн гэрээг дахин хянаж үзэж, өөрчлөлт оруулахыг дэмжсэн 10.000 орчим хүний гарын үсэг бүхий  Шаардах бичгийг гардуулан өгч байсан.

Шаардах бичигт:

-Монголын ард түмэнд Оюутолгойн ордын 51-ээс дээш хувийг эзэмшүүлэх;

-Өмнөговь аймагт дагуул хотуудыг барьж байгуулах;

-Байгалийн гүний цэвэр усыг ашиглахгүй, саарал ус ашиглах технологийг нэн яаралтай хэрэгжүүлэх гэсэн 3 үндсэн шаардлага тавьсан байдаг.

Тус хөдөлгөөний тэргүүн Б.Жагар дээрх шаардах бичгийн хариуг албан ёсоор өгч, УИХ-аас байгуулагдсан “Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэг бүхий Ажлын хэсгийн дүгнэлтийг намрын чуулганаар яаралтай хэлэлцэх, уг хэлэлцүүлэгт ТББ, Иргэний нийгмийн байгууллага, Улс төрийн намуудын төлөөллийг оролцуулж, олон нийтэд нээлттэй зохион байгуулахыг шаардаж буйгаа уулзалтын үеэр мэдэгдэв.

УИХ-ын Тамгын газрын Ерөнхий нарийн бичгийн дарга Ц.Цолмон хэлэхдээ, “УИХ-ын дарга М.Энхболд Захирамж гаргаж, Оюутолгойн ордыг ашиглах хөрөнгө оруулалтын гэрээний хэрэгжилтийг шалгаж, санал дүгнэлт гаргах үүрэгтэй Ажлын хэсгийг байгуулсан. Ажлын хэсгийн бүрэлдэхүүнд мэргэжлийн байгууллага, хүмүүс, иргэний нийгмийн төлөөллийг аль болох түлхүү оруулах ёстой гэж үзсэний дагуу  Мөн УИХ-ын дарга УИХ-ын намрын чуулганыг нээж хэлсэн үгэндээ Ажлын хэсэг дүгнэлтээ Байнгын хороо болон УИХ-д ойрын үед танилцуулахыг даалгасан. Та бидний байр суурь нэг байгаа гэдгийг хэлье. Намрын чуулганаар хуулийн дагуу Монгол Улсын 2019 оны төсвийн тухай хуулийн төслийг  хэлэлцэж дууссаны дараа  УИХ-д нээлттэй хэлэлцүүлэхээр болсон байна.

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close