Малчид, тариаланчид, хадланчдад зориулсан мэдээ: Ойрын өдрүүдэд ихэнх нутгаар бороо орохгүй, өдөртөө дулаарна.
2018 оны 09 дүгээр сарын 07-ны 08 цагаас 20 цаг хүртэл: Зүүн аймгуудын нутгаар солигдмол үүлтэй. Бусад нутгаар багавтар үүлтэй. Нийт нутгаар бороо орохгүй. Салхи бауун аймгуудын нутгаар зүүн өмнөөс, бусад нутгаар баруун хойноос секундэд 6-11 метр. Дархадын хотгор, Хангай, Хөвсгөл, Хэнтийн уулархаг нутгаар 10-15 хэм, Алтайн өвөр говиор 22-27 хэм, говийн бүс нутгаар 17-22 хэм, бусад нутгаар 14-19 хэм дулаан байна.
УЛААНБААТАР ХОТ: Багавтар үүлтэй. Бороо орохгүй. Салхи баруун хойноос секундэд 6-11 метр. 14-16 хэм дулаан байна.
2018 оны 09 дүгээр сарын 08-наас 09 дүгээр сарын 12-ныг хүртэлх цаг агаарын урьдчилсан төлөв 9-нд баруун аймгуудын нутгийн баруун хэсгээр, 10-нд баруун болон төвийн аймгуудын нутаг, говийн аймгуудын нутгийн өмнөд хэсгээр, 11-нд төв, говь, зүүн аймгуудын нутгаар бороо орно, дуу цахилгаантай. Уулархаг нутгаар нойтон цас орно.
Салхи 9-нд баруун аймгуудын нутгаар, 10-нд ихэнх нутгаар, 11-нд говь талын нутгаар түр зуур секундэд 16-18 метр хүрч ширүүснэ. Дархадын хотгор, Алтай, Хангай, Хөвсгөл, Хэнтийн уулархаг нутгаар шөнөдөө 1 хэм хүйтнээс 4 хэм дулаан, өдөртөө 14-19 хэм, говийн бүс нутгийн өмнөд хэсгээр шөнөдөө 8-13 хэм, өдөртөө 22-27 хэм, бусад нутгаар шөнөдөө 4-9 хэм, өдөртөө 17-22 хэм дулаан байна. 10-нд нутгийн баруун хэсгээр, 11-нд ихэнх нутгаар сэрүүснэ.
Сүүлийн хоёр өдөр ихэнх нутгаар хүйтэрч, нойтон цас орлоо. Энэ сарын 4-нд Баян-Өлгий, Увс, Завхан аймгийн зарим суманд нойтон цас орж, цочир хүйтэрсэн бол өчигдөр Завхан аймгийн Тосонцэнгэл, Нөмрөг сум, Хөвсгөл, Архангай аймгийн уулархаг нутгаар цас орсон аж. Харин Өвөрхангай, Булган, Орхон, Сэлэнгэ, Төв, Хэнтий аймагт усархаг бороотой байсныг Ус, Цаг уур, орчны шинжилгээний газраас мэдээлэв.
Нийт нутгийг хамарсан хур тунадас өнөөдрөөс зогсох төлөвтэй ч энэ сарын 10-наас дахин бороошихыг анхаарууллаа. Тодруулбал, энэ сарын 9-нд баруун аймгуудын нутгийн зарим газар, төвийн аймгуудын нутгийн баруун хэсгээр, 10-нд баруун болон төвийн аймгуудын нутгаар бороо орох аж. Нийслэлийн хэмжээнд өнөөдөр бороо үргэлжлэн орох тул иргэдийг үер усны аюулаас сэрэмжлэхийг нийслэлийн Онцгой байдлын газраар анхаарууллаа.
