Ховд аймгийн Мянгад сумын иргэн Б.Одбаяр Дорнод аймгийн Баяндун сумаас арслан зааны соёог олж, Палеонтологийн хүрээлэнд хүлээлгэн өгчээ. Зургадугаар сарын 27-ны өдөр тэрбээр сумын уурхайд ажиллаж байхдаа олдворыг санамсаргүй илрүүлжээ. Энэ талаар тэрбээр “Би Дорнод аймгийн уурхайд түр хугацаагаар ажиллаж байсан юм. Нэг том, хоёр жижиг соёо гарч ирсэн. Том нь 1 метр 20 см, хоёр жижиг нь 30, 30 см хэмжээтэй. Олсон даруйдаа хаана хандахаа мэдэхгүй нилээн удсан. Одоо уурхай нь ажиллахгүй байгаа” хэмээжээ.
Б.Одбаяр хосгүй үнэт олдворыг энэ сарын 3-нд холбогдох албаны хүмүүст хүлээлгэн өгсөн байна. Арслан зааны соёог Палеонтологийн хүрээлэнгийн хамгаалалтад авсан бөгөөд мэргэжилтнүүд 15-35 мянган жилийн өмнөх арслан зааны соёо байж магадгүй хэмээн таамаглаж байгаа аж.
