Ардын хувьсгалын түүхт 97 жилийн ой, Үндэсний их баяр наадам болоход хэдхэн хоног үлджээ. Баяр наадмын үеэр үүрэг гүйцэтгэх алба хаагчдынхаа болон наадамчин олны аюулгүй байдал, ая тухыг хангах зорилгоор Цагдаагийн ерөнхий газрын Санхүү, аж ахуйн албанаас бүтээн байгуулалтын ажлуудыг эхлүүлсэн байна.
Тухайлбал, “Хүй 7 худаг”-т байрлах цагдаагийн түр хүрээнд явган хүний зам тавьж, гэрэлтүүлгийн системийг шинэчилжээ. Мөн наадамчин олны аюулгүй байдлыг хангах, тэднийг болзошгүй эрсдэлээс урьдчилан сэргийлэх зорилгоор дотоодын цэргийн 5 дугаар ангийн алба хаагчид морь барианы хамгаалалтын шугамыг уртасгаж байгаа бөгөөд шонгуудад цацруулагчтай тэмдэг, тэмдэглэгээ нааж байна.
ЦЕГ-аас энэ жил улсын төсвийн хөрөнгө оруулалтаар замын цагдаагийн 27 постыг байгуулах аж. Иргэдээ зам тээврийн ослоос урьдчилан сэргийлэх, гэмт хэрэг, зөрчлийг илрүүлэх, таслан зогсоох чиглэлээр ажиллах энэхүү постуудын хоёрыг нийслэлийн Налайх, Сонгинохайрхан дүүрэгт байгуулах бол орон нутагт 17 аймгийн 25 цэгт пост барих юм байна.
Эх сурвалж: ЦЕГ-ын Хэвлэл, Мэдээллийн Төв