Юу болоод өнгөрөв өө, Тавантолгойг баталчихлаа гэж үү?

УИХ-ын хаврын чуулган өнгөрсөн баасан гаригт хаалтаа хийлээ. Отгон чуулганаар хүлээгдээд байсан хуулийн төслүүдийг бөөндөж, баталсан гэхэд болно. Тэр дундаа 10 жил яригдсан Тавантолгойг хөдөлгөх төслийг хаалтын чуулганаар амжаад баталчихлаа.

Ийм амархан баталчихна гэж зарим нэгний санаанд багтаагүй биз. Засгийн газар энэхүү төслийг зүтгүүлж эхэлснээс нэлээд хэл ам дагуулсан. Тухайлбал, Эрдэнэс Тавантолгой компанийн 84 хувийг эзэмшигч “Эрдэнэс Монгол” компанийн 49 хувийг иргэдийн эзэмшилд шилжүүлэх зарчмын зөрүүтэй саналыг АН-ын бүлгээс гаргасан нь гишүүдийн дунд талцал маргаан үүсгэсэн юм.

УИХ-ын гишүүн Д.Эрдэнэбат “Эрдэнэс Монгол” компанийн 49 хувийг иргэдийн эзэмшилд шилжүүлэх зарчмын зөрүүтэй санал гаргаж оруулж ирсэн ч УИХ дээр унасан учраас 34 хувийг нь иргэдэд эзэмшүүлэх асуудлыг судалж, оруулж ирээч ээ” гэж санал гаргаж байна. Хэрэв “Эрдэнэс Монгол” компанийн 34 хувийг иргэд эзэмшиж байвал хяналт тавих боломж бүрдэнэ” гэв.

Харин УИХ-ын гишүүн Ж.Мөнхбат “Энэ зарчмын зөрүүтэй саналыг дэмжихгүй байна. Засгийн газрын санаачилж оруулж ирээгүй зүйлийг цөөнх улстөрийн зөвшилцөл нэрээр оруулж ирж байна. Гуя дагаж хүзүү гэдэг байсан бол сөрөг хүчин хүзүү дагуулж гуя оруулж ирж байна. Энэ саналыг нь дэмжвэл дараа нь ард түмний өмнө буруудна шүү гишүүдээ” гэв.

УИХ-ын гишүүн З.Нарантуяа “Тавантолгойн нүүрсний ордын үйл ажиллагааг эрчимжүүлэх талаар авах зарим арга хэмжээний тухай УИХ-ын тогтоолын төсөл дотор чинь Эрдэнэс Монгол компанийг байхгүй болгох заалт ороод ирсэн байна. Тогтоолыг нь сайжруулъя гээд санал гаргахаар хадуураад явчих юм. 10 жилийн өмнө хачин сүртэй байгуулсан компани чинь өнөөдөр зам арчлалтын компани болчихоод байна. Гуя дагаж хүзүү гэж та нар намайг шоолоод байна.

Харин та нар хүзүү дагуулж гуяа алга болгох гэж байна шүү” гэлээ. Ингээд зарчмын зөрүүтэй саналаар Эрдэнэс Монгол компанийн 34 хувийг иргэдийн эзэмшилд шилжүүлэх тухай санал хурааж хуралдаанд оролцсон гишүүдийн 30.9 нь дэмжиж, санал дэмжигдсэнгүй. Харин Тавантолгойн нүүрсний ордын үйл ажиллагааг эрчимжүүлэх талаар авах зарим арга хэмжээний тухай Улсын Их Хурлын тогтоолын төслийг баталъя гэсэн томьёоллоор санал хурааж баталсан юм.

Хэлэлцэж буй асуудалтай холбогдуулан гишүүд асуулт асууж, үг хэлэх үеэр гишүүдийн зүгээс “Тавантолгойг эрчимжүүлэх тал дээр дэмжсэн байр суурьтай байгаа хэдий ч Засгийн газар энэ асуудлыг УИХ-д оруулж ирэхдээ тооцоо судалгаа бага хийсэн байна” гэх шүүмжлэлийг илэрхийлж байсан. Ийнхүү 10 жил хүлээгээд байсан Тавантолгойг нэг л чуулганаар баталчихлаа.

Т.Сайхан

Эх сурвалж: “Зууны мэдээ” сонин

Хариулт үлдээнэ үү

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн