“Дэлхийн эмч нарын өдөр”-ийг тохиолдуулан Эрүүл мэндийн яам, МЭМАҮЭХ-ноос хамтран “Алтан чагнуур” шагнал гардуулах ёслолын ажиллагааг 7 дахь жилдээ зохион байгууллаа.

Тус шагнал нь эрүүл мэндийн салбарт өөрийн эрдэм мэдлэг, ур чадвараа дайчлан эрүүлийг хамгаалах үйлсэд цаг наргүй зүтгэн ард иргэдийнхээ дунд алтан гартай эмч хэмээн хүндлэгдэж байдаг эмч нартаа ажиллах урам зоригоор тэтгэсэн нэр хүндтэй шагнал юм. Уг шагналд нийслэл болон хөдөө орон нутгийн эрүүл мэндийн байгууллагуудаас шалгарсан 60 гаруй эмч нэр дэвшин өрсөлдсөн юм. Ёслол хүндэтгэлийн ажиллагаанд Эрүүл мэндийн дэд сайд Л.Бямбасүрэн, Төрийн нарийн бичгийн дарга Д.Очирбат, Монголын эрүүл мэндийн ажилтны үйлдвэрчний эвлэлийн холбооны дарга Б.Мягмар, УНТЭ-ийн ерөнхий захирал Б.Бямбадорж болон бусад албаны хүмүүс, эмч нарын төлөөлөл оролцлоо. Энэ үеэр Эрүүл мэндийн дэд сайд Л.Бямбасүрэн хэлэхдээ Энэ жилийн Алтан чагнуурын эздээр, шинээр эмчилгээ оношилгооны арга технологи нэвтрүүлсэн эмч нар олон байна. Тухайлбал, Улсын гуравдугаар төв эмнэлгийн их эмч, мэс заслын төрөлд нэр дэвшиж буй …, чөмөг шилжүүлэн суулгах мэс заслыг монголд анх удаа хийсэн УНТЭ-ийн дотрын их эмч, цусны төвийн эрхлэгч Н.Оюундэлгэр, мөн Баянхонгор, Баян-Өлгийн зэрэг аймгуудын эмч нар нэр дэвшиж байна. Насны хувьд хамгийн залуу эмч нь 36 настай, эмч мэргэжлээрээ 11 жил ажилласан эмч байгаа бол хамгийн ахмад нь 60 настай эмч байна. Үүнээс харахад жил ирэх бүр уг шагналын үнэ цэнэ улам өсөж, мэргэжилдээ хайртай, дуртай эмч нар олон болж байгаад талархаж байна. Нийт монгол 47 мянга гаруй эмч эмнэлгийн ажилчид, тэдний ар гэрийнхэнд дэлхийн эмч нарын өдрийн баярын мэндийг хүргэж, хамгийн сайн сайхан бүхнийг хүслээ.

Энэ жилийн “Алтан чагнуур”-ын эзэд болсон эмч нарыг танилцуулж байна.

• Нийслэлийн шүд эрүү нүүрний төвийн нүүр амны согог заслын тасгийн их эмч, нүүр амны согог заслын багш Л.Өнөржаргал
• Завхан аймгийн нэгдсэн эмнэлгийн дүрс оношилгооны их эмч Б.Уранцэцэг
• ХӨСҮТ-ийн шинэ болон сэргэж буй халдварын тасгийн эрхлэгч Ж.Улаан
• Улсын гуравдугаар төв эмнэлгийн мэдрэлийн мэс заслын тасгийн их эмч Л.Аважигмэд
• Сэлэнгэ аймгийн Бугант тосгоны Эрүүл мэндийн төвийн эрхлэгч, мэс заслын эмч Г.Сахьябазар
• Баянзүрх эмнэлэг” ХХК-ний насанд хүрэгсдийн өвчин судлалын их эмч Ш.Дэлгэрмаа
• Баянхонгор аймгийн нэгдсэн эмнэлгийн мэдээгүйжүүлэг, эрчимт эмчилгээний их эмч Ч.Жавзан
• ЭХЭМҮТ-ийн эх барих эмэгтэйчүүдийн эмнэлгийн нөхөн үржихүйн поликлиникийн эх барих эмэгтэйчүүдийн их эмч Б.Пагма
• УНТЭ-ийн Цусны эмгэг судлал, чөмөг шилжүүлэн суулгах төвийн эрхлэгч их эмч Н.Оюундэлгэр

ЭХ СУРВАЛЖ: ЭМЯ