Дэлхийн долоон удаагийн аварга Т.Цэрэндолгор хөнгөн атлетикийн ахмадын ДАШТ-ээс нэг алт, хоёр мөнгөн медаль хүртлээ. Тэмцээн энэ сарын 19-25-ны өдрүүдэд зохион байгуулагдсан БНСУ-ын Дэгү хотод амжилттай болж өндөрлөсөн юм. Нийт 74 орны 4800 гаруй тамирчин ур чадвар, авхаалж самбаагаар өрсөлдсөн бөгөөд манай улсаас гавьяат тамирчин Д.Намжилмаагийн удирдлага дор 24 гүйгч өрсөлдөж, зургаан медаль хүртжээ.
Т.Цэрэндолгор жад шидэлтийн 75-79 насны ангилалд ийнхүү амжилттай оролцов. Тэрбээр өдгөө 79 настай бөгөөд Ази тивийн 25 удаагийн аваргаар шалгарч байсан юм. Мөн хөнгөн атлетикийн 55-60 насныхны найман км-ын зайд Ж.Энхтайван, 45-50 насныхны найман км-т О.Сарантуяа, жад шидэлтийн 60-64 насны ангилалд Г.Алтанцэцэг нар хүрэл медаль хүржээ.
