АТҮТ-ийн бүртгэгч нар хууль бусаар найман автомашиныг өөр компанийн нэр дээр шилжүүлсэн байна. Иргэдээс ирсэн мэдээллийн дагуу Зам тээвэр хөгжлийн сайд Ж.Бат-Эрдэнэ автомашины бүртгэлийн үйл ажиллагаанд шалгалт явуулахад АТҮТ-ийн байцаагч Н.Баярсайхан, А.Сарантуяа, Т.Уртнасан, Н.Урнаа нар нь өнгөрсөн оны арванхоёрдугаар сарын 15-нд “Гранд зам транс” ХХК-ийн өмчлөлд бүртгэлтэй 87-91 УБТ, 89-41 УБЧ, 68-76 УБО, 58-36 УБЗ, 88-06 УБЧ, 94-11 УБТ, 78-27 УНМ, 62-01 УБЗ улсын дугаартай авто машинуудыг “Гранд зам транс” ХХК-ийн нэрээр “Гүрэн транс” компаний эзэмшилд шилжүүлсэн бүртгэлийг хийж, мөн улсын дугаарыг өөрчилсөн болохыг холбогдох албаны хүмүүс тогтоожээ.
“Гранд зам транс” компани нь өөрсдөө ч мэдээгүй байтал нь ийнхүү шилжүүлсэн байсан учир Зам тээвэр хөгжлийн сайд Ж.Бат-Эрдэнэд гомдол гаргасан байна. “Гранд зам транс” компанитай ойролцоо нэртэй “Гүрэн транс” компани руу хууль бусаар шилжүүлсэн үйлдлээ байцаагч нар “”Гранд транс” компаний нэр дээр ирсэн хүсэлтийн дагуу авто тээврийн хэрэгслийг шилжүүлж бүртгэл хийхдээ ЗАМ гэдгийг нь нягтлаагүйгээс ийнхүү ажлын хариуцлага алдсан” гэж тайлбарлажээ.
Харин ЗТХ-ийн сайд Ж.Бат-Эрдэнэ “АТҮТ дээр ийм зөрчлүүд олонтаа яригддаг сонсогдог, бүртгэл зөвшөөрлийн бичгийг дамладаг асуудал олон яригддаг. Энэ хэрэг ч мөн ажлын хариуцлага алдахаас илүү төрийн үйлчилгээг мөнгө болгож хардаг, зардаг мафижсан луйврын хэргийн нэг хэсэг. Тиймээс хууль хяналтын байгууллагаар шалгуулах ёстой” гэсэн байна.
Тиймээс холбогдох албан тушаалтнуудад хариуцлага тооцохыг шаардаж, улмаар уг хэргийг хууль хяналтын байгууллагад шалгуулахаар холбогдох материалын хамт өгсөн байна.
