Хятадууд монгол хэлийг минь өмчлөхөөр санаархаж байна

АНУ-д амьдардаг, Монголын иргэн Л.Мөнхтөрөөс Монгол Улсын төрийн өндөрлөгүүдэд хандаж дараах шуурхай захидлыг илгээжээ.

ИЛ ЗАХИДАЛ

Монгол Улсын ерөнхийлөгч Х.Баттулга, УИХ-ын дарга М.Энхболд болон нийт гишүүд, ерөнхий сайд У.Хүрэлсүх, БСШУСЯ-ны сайд Ц.Цогзолмаа нар, танаа

Та бүхэн сар шинэдээ сайхан шинэлцгээв үү?
Тавтай сайхан хаваржицгааж байна уу?

Жавар жанжин харьж, хавар цаг айлсан бүхий “Нөхөрсөг” хэмээх нохой жилийн тэргүүн, бар сарын шинийн 12-ний мэндийг хүргэж, Та бүгдийн амрыг асуун мэндчилье!

Түмнээ төлөөлж, төрөө төвшитгөх их ажилд тань түвэг удахгүй байя гэхнээ хойшлуулж болшгүй, онц чухал хэрэг гарсан тул арга буюу цахим өртөөгөөр энэхүү захидлыг яаравчлан илгээж, Та олны гэгээн мэлмийд толилуулан шийдүүлэхээр зориглов.

Учир юу гэвэл, ойрмогхон, дэлхий нийтийн бичиг үсгийн нэгдсэн, цахим стандартыг тогтоон, тэрхүү стандарттай холбоотой аливаа хэргийг дагнан хариуцдаг, Майкрософт, Гүүгэл, Адоб, Айпл, Оракл, САП, Ай Би эМ, Фэйсбүүк, Нетфликс зэрэг мэдээллийн технологийн “аваргууд”-ын нэгдэл болох Unicode Consertsium буюу Олон Улсын Бичиг үсгийн Стандартын Техникийн Хорооноос “-Хэрвээ, ирэх 4 сард багтаан өөрсдийн эцсийн, сайжруулсан хувилбараа ирүүлэхгүй бол бид БНХАУ-ын талын боловсруулсан “Монгол бичгийг график дүрслэлтэй болгох” төслийг дэмжиж, түүгээр шийдэх болно!” хэмээн “тулган шаардаж”, эл асуудлыг манай талаас сайн дураараа, чин сэтгэлээсээ хариуцан өнөөг хүртэл төрөөс ацаг хөлс нэхэлгүй ажилласаар ирсэн Болорсофт зэрэг байгууллага, бичиг үсгийн тиг, эх загвар зохиогч эрдэмтэн мэргэд, хувь уран бүтээлчдийн сэтгэлийг чилээж, санааг зовоож байгаа мэдээ бичиг соёлоо гэсэн сэтгэлтэй олныг сэртхийлгэж, тайван суухын аргагүй болголоо!

“Монгол бичгийг график дүрслэлтэй болгох” төсөл гээч нь юу вэ гэвэл дижитал буюу цагаантолгойтой хэлний нэг авианд нэг тэмдэгт оноодог тоон технологийн давуу тал ихтэй шийдлийг даган цахим орчинд саадгүй, шуурхай бичиж, чөлөөтэй хөрвөх боломжтой болсон монгол бичгийн юникод стандартыг бүрмөсөн устгаж, оронд нь өвөрлөгч ах дүү нарын маань өрөөлийн эрхэнд боловсруулсан өнөөх “график” гэх гэмгүй тодотголтой, үнэн чанартаа хятад ханзны дүрслэлд суурилсан загварт шилжүүлэх их гүрний захиалга, далд түрэмгийлэл, зөөлөн хүчээр манай, Монголын гэсэн юм бүхэнд эзэн суух гэсэн санаархалд үйлчилсэн шантааж юм! Хэрвээ тэдний хүслээр болох юм бол, мөхөс миний ухаж байгаагаар ганц Ү үсэг бичихийн тулд титэмтэй шүд, гэдэс, шилбэ гэсэн гурвын гурван тэмдэгт бичиж байж сая нэг юм бичиж барах ба тэр хэрээр компьютерт монгол бичгээр бичих хурд 3 дахин буурна гэсэн үг!

Үүнээс илүү хор хохиролтой нь юу вэ гэвэл Монгол хэмээх үндэстэн-улсын хэл соёлын дархлаа болсон, дэлхийд ганцхан босоо монгол бичиг, өвөг дээдсийн өвлүүлсэн, мянгаас хол илүү жилийн түүхтэй гайхамшигт өв соёл маань цахим орчинд замхран, хятад ханзны хавсарга маягтай болж, нийт монгол үндэстний хувьд нөхөшгүй гарз хохирол учирч, түмэн үедээ харамсаад ч баршгүй явдал болно. Ийм гутамшигт явдлыг гаргуулахгүйн тулд Та бүгдээр энэ хэрэгт онцгойлон анхаарч, туйлын няхуур хандан, дээр дурдсан байгууллага, хувь хүмүүсийн төлөөллийг хүлээн авч уулзан, тэдэнд тулгарч байгаа санхүү мөнгөний гачаалаас салгаж, өөр ажилд сатааралгүй, зөвхөн энэ ажлыг бүтээх багийн нийт 6-7 хүнийг төрөөс дор хаяж 3 жилийн хугацаанд уг асуудлыг тогтворжуулж, бүрэн шийдтэл тусгайлан цалинжуулж, Юникод-ын бүрэн эрхт гишүүн байгууллагын 3 жилийн эрхийн хураамж, АНУ-д болох 5-6 хуралд тогтмол оролцох, нэг хурлыг Улаанбаатарт зохион байгуулахад нийт 1.5 тэрбум төгрөгийн зардлыг шийдэж, үүнээс эхний ээлжинд ирэх 4 сард АНУ-ын Сан Хосе хотод болох Юникодын Техникийн Хорооны хуралд оролцож, шийдлээ танилцуулахад гарах өргөдлийн хураамж, 2 хүний ирэх, буцах нислэг, зочид буудал, хоол, унааны зардалд 75 сая төгрөгийг (Ерөнхийлөгчийн багц, Засгийн газрын нөөц хөрөнгө, БСШУСЯ-ны сайдын багц дахь болзошгүй зардал… болон бусад боломжит эх үүсвэрээс яаравчлан бүрдүүлж), тэдэнд хийх ёстой ажил – сайжруулсан, эцсийн хувилбар-аа энэ ганцхан сар хүрэхгүй хугацаанд, чанартай бүтээж амжуулах улсын тусгай даалгавар өгч, зүйл бүрээр тэтгэн тусалж, энэ чухал үйл хэргийг гүйцэлдүүлнэ үү хэмээн хичээнгүйлэн хүсэж байна.

Ажлын биелэлт, мөнгөний зарцуулалтад хяналт тавьж, хариуцах эрх бүхий 1 хүнийг ерөнхийлөгчийн тусгай элчээр томилон хамт явуулбал зохих болов уу.

Өр, зээл, утаа, шатахуун, цалин мөнгө, авлига, офшор… гээд шийдэх асуудал, хийх ажил өч төчнөөн, хөрөнгө мөнгө хомс, эдийн засаг хүнд байгаа ч гэлээ яг энэхэн цаг үеийн, хожим хойно нь гарч болох хор хөнөөл, үр дагаварыг нь төсөөлөхөд бэрх, хойш тавилгүй шийдвэл зохих чухал асуудал гэвэл энэ л байна!

Хятадууд урьд өмнө нь өвөрлөгч ах дүү нараар маань барьцаалан манай өв соёлын охь манлай болсон уртын дуу, морин хуур гээд гялайх гялтайх бүхнийг маань “хамтран” эзэмшсэн. Одоо монгол бичгээр дамжуулан монгол хэлийг маань өмчлөхөөр санаархаж байна!

Өдийг хүртэл өвөрлөгч ах дүү нар маань бидэнтэй хамтран ажиллаж, монгол бичгийн юникод-цахим стандартаа чадлынхаа хэрээр хөгжүүлсээр ирсэн боловч, дээрх байгууллагын тулган шаардалтад хүчин мөхөстөж, их гүрний эзэн эрхэд баригдаад яах ч аргагүй байдалд орчхоод байна. (Жич: Та бүхэн шаардлагатай гэж үзвэл энэ асуудлыг УИХ-ын чуулганаар хаалттай хэлэлцэж, ҮАБЗ-ийг хуралдуулж ч болох юм.)

Тавхан хоногийн өмнө бид дэлхий даяараа “Олон улсын эх хэлний өдөр”-ийг тэмдэглэн өнгөрүүлсэн ба тус өдрийг тохиолдуулан ЮНЕСКО-ийн ерөнхий захирал Одри Азулэй хэлэхдээ, “…- Өнөөдөр ЮНЕСКО нь олон улсын Эх хэлний өдрийг 19 дэх удаагаа тэмдэглэж байна. Хэлийг хамгаалах, дэмжин сурталчлах үүрэг, амлалтаа эргэн санах өдөр. Хэл нь зөвхөн харилцаа холбооны хэрэгсэл төдийгүй, хүн төрөлхтний оршин тогтнохын үндсэн нөхцөл юм. Бидний үнэт зүйлс, бидний итгэл үнэмшил, бидний хэн болохыг тодорхойлдог зүйлс бүгд хэлэнд шингэсэн байдаг. Бид өөрсдийн туршлага, өв соёл, мэдлэгээ хэлээр дамжуулдаг…Бидний үйл ажиллагаандаа сая сая залуусын оюун ухааныг төлөвшүүлэгч эх хэлийг онцгойлон анхаардаг. …Түүнчлэн, олон нийтийн газар болон олон нийтийн цахим сүлжээнд эх хэлээ ашиглахыг онцгойлон зөвлөж байна. …” гэж онцлон дурджээ.

Тэгвэл тэрхүү эх хэлийг биежүүлэгч, түгээн дамжуулагч хэрэгсэл нь үндэсний бичиг үсэг билээ. Та бид хүн төрөлхтний халуун ам бүлийн нэг, НҮБ-ын бүрэн эрхт гишүүний хувиар Монгол Улс, монгол үндэстэн оюун санаа, хэл соёлоороо тусгаар оршин тогтнохын үндэс болсон монгол хэл, түүний удмын санг хадгалагч монгол бичгээ хайрлан хамгаалж, хойч үедээ өвлүүлэн үлдээх нэн эрхэм бөгөөд хэнд ч ацаглаж, хэзээ ч хөсөрдүүлж болохгүй хүнд үүрэг хүлээцгээсэн улс билээ. Энэхүү үүргээ гүнээ ухамсарлаж, цаг үеийн тулгасан хатуу сорилтыг даван туулж, нэр төртэй биелүүлж чадаж гэмээнэ та бид нийт монгол үндэстний өвөг дээдэс, өнөө хийгээд өнө хойчийн өмнө дараачийн хэдэн мянган жилд ч үл мартагдах баатарлаг нэгэн гавьяаг хамтдаа байгуулах бус уу?!

Ийм л үйлсэд үндэстнээрээ, улсаараа нэгдэж ажиллахгүй бол өөр юун дээр нэгдэх билээ бид!

Үүний тулд машид хичээнгүйлэн үйлдэх болов уу хэмээн төр түшиж, засаг барьж буй эрхэм Та бүхэнд гүнээ итгэж, гадаад дахь монголчуудаа төлөөлөн энэхүү ил захидлыг илгээв. Захидлын хариуг хуульд заасан хугацаанд, “Төрийн мэдээлэл” сэтгүүл, МҮОНРТ болон олон нийтийн бусад хэрэгслээр нийтэд ил тод өгнө үү.

Төр төвшин, түмэн олон амгалан байж, хэл, бичиг, өв соёл маань мөнхөд дэлгэрч, Монгол Улс маань үүрд орших болтугай!

Хичээнгүйлэн гуйж, ёсолсон: 

Өндөрүүд Лувсанжамбаагийн Мөнхтөр

Лос Анжелес хот, АНУ

 

Эх сурвалж: http://gashuun.mn/3155

4 thoughts on “Хятадууд монгол хэлийг минь өмчлөхөөр санаархаж байна

  1. Нэргүй 2018-03-02 16:11 at 16:11

    төр засгийн өндөрлөгүүд үнэхээр анхаарамаар асуудал байна даа

    Хариулах
  2. unshigch 2018-03-03 02:31 at 02:31

    huuchin mongol bichgiig mongol ulsad heregledeggyi ni ynen biz dee. harin ovor mongol hyatad ulsiig odoo hyrtel hereglej hairlan hyamgadaj heregleseer baina. iimees ene bichig haana hyndetgej hereglegdej baina ter ulsdaa byrtgegdeh heregtei.. huuchin mongol bichgee ar mongoluud hairlaj hyndetgeed hereglehiig ni hen boli gesen be. chadaagyi bol bitgii gonginood bai

    Хариулах
  3. mongol 2018-03-03 13:48 at 13:48

    bidnii tsuuhun mongolcuud mine hedii boltol hytaduudad darluulah ym be bid tusgaar Tur ulastain bol odool her shyyttei bgagaa harii

    Хариулах
  4. монгол 2018-06-22 17:10 at 17:10

    Монгол бичиг ч гэх шиг. Лалын шашинт уйгаруудын бичиг шүү дээ. Кирилл үсэг бол төгс үсэг.

    Хариулах

Хариулт үлдээнэ үү

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн