“60 тэрбум”-ын хэрэгт нэгэн яамны газрын даргыг шалгаж байна

2016 оны хавраас хойш шуугиан дэгдээсээр байгаа МАН-ын 60 тэрбум төгрөгтэй холбоотой хэрэг өнөөдөр ч анхаарлын төвд байна. Өнгөрсөн оны наймдугаар сараас хойш шалгаж буй энэ хэрэгт Г гэх нэгэн яамны газрын дарга холбогджээ. Түүнийг  бусдаас 200 сая төгрөг зээлэн авч, МАН-ын удирдах албан тушаалтнуудад өгч, төрийн албан тушаалыг  худалдаж авсан эсэхийг шалгаж эхэлжээ. Энэ асуудлаар “Баян ……..” ХХК-ийн захирал Б гэгч АТГ болон Улсын мөрдөн байцаах газрын Эдийн засгийн гэмт хэрэгтэй тэмцэх хэлтэст өргөдөл өгсөн байна. Үүнд,

“Хорлоо овогтой Д түүний хүү ………..  яаманд газрын дарга ажилтай Г нарт 200 сая төгрөгөө залилан мэхлүүлсэн тул шалгуулахаар гомдол гаргаж байна. 2015 оны  зургаадугаар сарын 16-ны өдөр Хорлоо овогтой Д, түүний хүү нэгэн яаманд газрын дарга ажилтай Г нар нь М…. компанийн нэрийг барьж, манай компанийн тусгай зөвшөөрөл нь их хэмжээний алттай, 200 сая  төгрөг зээлээч, уул уурхайн үйл ажиллагаагаа эхлэхээр эргүүлээд өгье гэж хэлсэн. Мөн Д нь Монгол Ардын Нам сонгуульд ялахаар манай хүү газрын дарга болоход дээрх мөнгийг зарцуулна, намын дарга нарт өгнө гэж хэлээд 200 сая төгрөг зээлсэн.

Гэтэл тухайн тусгай зөвшөөрөл нь ямар ч алтны нөөцгүй байсан бөгөөд намайг залилсан гэдгийг сүүлд мэдээд мөнгөө нэхтэл удахгүй өгнө гэсээр өнөөдрийг хүрсэн. Хорлоо овогтой Д-ийн хүү нь 2016 оны УИХ-ын  сонгуулийн дараа нэгэн яаманд газрын дарга болсныг саяхан мэдсэн. Надаас залилан авсан 200 сая  төгрөгөөрөө төрий албан тушаал худалдан авсан болох нь тодорхой байна. Үүнийг шалгаж өгнө үү” гэжээ.