О.Баасанхүү: ТЕГ-ын даргын мэдээллийг цочирдсон, албан тушаалаа өгөх нь хэмээн сандарсан гэнэн үйлдэл гэж харахгүй байна

УИХ-ын гишүүн О.Баасанхүүгийн өчигдөр (2017.10.27) МАХН болон Хууль зүй, дотоод хэргийн сайд Ц.Нямдоржийн асуудлаар хийсэн мэдэээллийн онцлох мөрүүдийг түүвэрлэн хүргэж байна.

• Тагнуулын Ерөнхий Газрын дарга өчигдөр мэдээлэл хийсэн. Үүнийг би цочирдсон, албан тушаалаа өгөх нь хэмээн сандарсан гэнэн үйлдэл гэж харахгүй байна.
• УИХ-ын өнөөдрийн чуулган дээр Хууль зүй, дотоод хэргийн сайд Ц.Нямдоржид нэр холбогдсон 42 сая долларын хэргийг нээлттэй ярих ёстой гэж хэлсэн. Энд шахааны бизнесийн талаар ярьсан. Би Эрдэнэтээс сонгогдсон. Эрдэнэтийн иргэд ядуу, ажилгүй зовдог шалтгаан нь шахааны бизнес. 1990-ээд оноос хойш шахааны бизнес газар авсан. Би АТГ-т олон материал өгсөн байгаа. Тийм учраас Хууль зүйн сайд нь хүртэл ийм зүйл ярьж байгаа бол үнэн худлыг шалгах, мөн яагаад шахааны бизнест холбогдох болсныг бид сонсох ёстой. Хэрвээ энэ асуудал үнэн байвал гэмт хэрэгт тооцогдоно. Хууль зүйн сайд нь дээр үеийн явдал гэж яриад байж болохгүй биз дээ. Би эцэг хүний хувьд хүүхэддээ тусалсан, миний багшийн хүүхэд байгаа юм гэж яриад байна. Тэгэхээр үүнийг шалгаж, гэм буруутай эсэхийг шүүх тогтооно.
• Хууль зүйн сайдын тайлбарыг сонссон. Гэхдээ хүн бүхэн өөрийгөө л өмөөрнө. Тагнуулын байгууллага энэ асуудлыг гаргаж байгаа нь ноцтой асуудал. Мэдээллийг сонсож байхдаа би мөрдөн байцаалтын ажиллагаа дуусаагүй байхад тодорхой ажлын хэсгийг нь сольж, болиулах вий. Гадны нөлөө орчихвий гэж болгоомжилж байна уу гэж харсан.
• МАХН-ын хувьд одоогийн намын удирдлага, ялангуяа Н.Энхбаяр даргыг хүрээлсэн, магадгүй өөрөө ч оролцсон байхыг үгүйсгэхгүй зохион байгуулалттай үйл ажиллагаанууд явж байгаа учраас үүнийг зогсоох ёстой гэдгийг намын удирдлагууд болон, гишүүддээ хандан хэлж байна.
• Би МАХН-ыг хагалан бутаргах биш, аврахыг, 30 гэр бүлд үйлчилдэг биш, Монгол Улсын иргэдэд үйлчилдэг болгохыг, мөн энэ улсыг хөгжүүлэхийн тулд үзэл бодол, зорилгоороо нэгдэхийг хүсч байна. Ийм л зорилгоор явж байгаа болохоос биш, Би өөрийгөө бодсон бол аль нэг нам уруу орж, албан тушаал аваад, Ерөнхийлөгчийн сонгуульд оролцохын тулд намынхныгаа ерөнхийлөгчийн сонгуульд оролцуулахгүй бойкот хийж болно. Гэтэл эсрэгээрээ байхад намайг улс төрийн алуурчин гэж хэлж байгаа нь утгагүй.
• Коммунизмийн үед хэн нэгнийг төрийн эсрэг гэмт хэрэгтэн гэж хэлээд нутаг заах, эсвэл сэтгэцийн эмгэгтэй гээд эмнэлэгт хэвтүүлчихдэг хоёр арга байсан. МАХН яг л ийм байдалтай байдаг учраас намын шинэчлэлтийг явдгаар нь явуулахын тулд 73 хүн гарын үсэг зурсан. Гэвч өдөр болгон утсаар дарамталж, гарын үсэг зурсан үгүйг шалгаад хэрэв зурсан бол буцаан тат гэх мэтээр дарамталж байна. Тэр хүмүүс айдас дунд байна. Хардах эрх байж болно. Гэхдээ хэвлэл мэдээллийн хэрэгслээр доромжлох эрх байхгүй гэдгийг сануулъя.