Н.Баяртсайхан: 2018 оноос эдийн засаг тогтворжино

УИХ-ын Эдийн засгийн байнгын хорооны өнөөдрийн хуралдаанаар “Төрөөс мөнгөний бодлогын талаар 2018 онд баримтлах Үндсэн чиглэл батлах тухай” УИХ-ын тогтоолын төслийн хэлэлцэх эсэх хэлэлцүүлгийг хийв.

Хэлэлцүүлгийн үеэр УИХ-ын гишүүн Б.Баттөмөр, “Ирэх оны төсвийг Засгийн газар өргөн барьсныг буцаан татсан байгаа. Гэтэл мөнгөний бодлого, төсвийн бодлоготойгоо уялдаж байдаг. 2018 оны төсөвтэй холбоотой асуудлууд тодорхойгүй үед мөнгөний бодлогыг ярих нь хэр оновчтой юм бол. Хугацаа хэтэрсэн болон чанаргүй зээлийн хэмжээ буурахгүй байгаа. Санхүүгийн тогтворгүй байдал үүсэх юм биш биз” гэсэн асуудлыг тодруулсан.

Эл асуултад Монголбанкны Ерөнхийлөгч Н.Баяртсайхан, “Засгийн газар 2018 оны төсвөө буцаагаад татсан. Ойрын үед өргөн барина гэж ойлгож байгаа. Ер нь мөнгөний бодлогыг боловсруулахдаа анхнаасаа төсөвтэй уялдаатай боловсруулсан.2016-2017 он бол амаргүй он жилүүд болж өнгөрч байна. Хүндрэлийг бид амжилттай даван туулж байна. 2018 онд Монголын эдийн засагт тогтворгүй нөхцөл байдал үүсэхгүй гэдэгт итгэлтэй байна. Харин ч 2018 оноос эдийн засаг тогтворжино хэмээн харж байна.ОУВС-тай байгуулсан хөтөлбөрийн хүрээнд хоёр дахь шатны үнэлгээ хийж байна. Энэ үнэлгээ амжилттай болвол олон улсын донор байгууллагуудаас он дуустал 580 орчим сая ам.доллар орж ирнэ. Ирэх онд нэг тэрбум ам.доллартай тэнцэх хэмжээний мөнгө манай улсын эдийн засагт орж ирэх гэж байна. Энэхүү мөнгөн урсгал Монголын эдийн засгийг тогтворжуулна.

Харин энэхүү аятай боломжийг ашиглаж томоохон төсөл хөтөлбөрүүдээ хөдөлгөж эхлэх цаг нь болсон. Мега хөтөлбөрүүдээ хөдөлгөж байж манай улсын эдийн засагт өсөлт харагдах болно” гэлээ.

Энэ үеэр хэлэлцэж буй асуудалтай холбогдуулж гишүүд асуулт асууж, үг хэлсэн бөгөөд улмаар чуулганы хуралдаанаар хэлэлцүүлэхээр тогтов.