S.Outlet дэлгүүр, Aqua garden хорооллын барилгыг нураах асуудлаар Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг мэдээлэл өглөө.
Тэрбээр “S.Outlet дэлгүүрийн газар эзэмшигч болон үл хөдлөх хөрөнгө эзэмшиж буй компанийн төлөөлөлтэй уулзсан. Харилцан тохиролцох байдлаар газраа чөлөөлөх асуудлыг урьдчилсан байдлаар ойлголцсон. Шүүхийн маргааныг хүлээвэл сунжирсан, хугацаа авах зүйл болох гээд байгаа юм.
Гүүрний хэсэгт байгаа хоёр давхар байшинг нураах ажлыг эхлүүлэхэд татгалзахгүйг S.Outlet дэлгүүрийн болон газар эзэмшиж байгаа хүмүүс хэлсэн. Бусад асуудлын тухайд газрыг чөлөөлж байгаа учраас үл хөдлөх хөрөнгийг үнэлж, ямар байдлаар нөхөн олговор өгөх зэргийг ярилцах шаардлага бий. Өнөөдрөөс барилгыг нураах ажил үе шаттайгаар эхэлж байгаа гэж ойлгож болно.
Долоон давхраас дээш өндөр барилга нурааж байсан туршлага манайд байхгүй юм билээ. Өндөр барилга нураахад гадаадын туршлагатай байгууллагыг оролцуулахыг үгүйсгэхгүй. Нийслэлийн Засаг даргын гаргасан шийдвэрийн хэрэгжилтийг хангаж, буулгана.
Голын ай савын газрыг инженерийн зөв шийдлээр хийх зардлыг төсөвт тусгана.
Aqua garden хорооллын асуудал шүүхийн шатанд байгаа. Шүүхийн шийдвэр албажихаар мэдээлэл өгнө. Тус хорооллын хэдэн барилгыг нураах нь Засаг даргын захирамжийн хүрээнд явагдана
Үерийн эрсдэлийн үнэлгээ хийгдэж байна. Голланд улсын туршлагыг судалж, Улаанбаатарын үер усны байгууламжийн асуудлыг цогцоор шийдэхээс өөр аргагүй.
Туул, Сэлбэ, Дунд голын ай савыг дагасан үер усны байгууламжийн нөхцөл байдлыг дүгнэж, хэр хэмжээний хөрөнгө оруулалт шаардлагатай, инженерийн ямар шийдэл тохиромжтой талаар мэргэжлийн хүмүүсийн судалгааг дагаж шийднэ” хэмээн ярилаа.
Шунхлай ШТС-ын барилгыг нураахад 300 сая төгрөг зарцуулна гэдгийг тэрбээр хэлэв.
