Ерөнхий сайдын захирамжаар “Ногоон технологи, ногоон эдийн засгийг дэмжих зорилгоор цахилгаан автомашины хэрэглээг нэмэгдүүлэх, цэнэглэх төвүүдийг байгуулах шийдлийг батлуулах, хэрэгжүүлэх” ажлын хэсгийг Зам, тээврийн хөгжлийн сайд С.Бямбацогт, Төрийн нарийн бичгийн дарга С.Батболд нар ахлан ажиллаж байна.
Энэ хүрээнд холбогдох яам, агентлаг, ажлын хэсгийнхэн хуралдаж, цахилгаан автомашины хэрэглээг нэмэгдүүлэх төлөвлөгөө, санал, шийдлээ хуваалцлаа.
Одоогоор манай улсад 709 цахилгаан тээврийн хэрэгсэл байна. 2026 он гэхэд 20.000 цахилгаан автомашиныг хэрэглээнд нэвтрүүлж, төр, хувийн хэвшлийн түншлэлийн хүрээнд цахилгаан машин цэнэглэх 1000 станц байгуулахыг зорьж байна.
Түүнчлэн цахилгаан автомашины импортыг дэмжиж, цэнэглэгч, сэлбэгийг Гаалийн албан татвар болон НӨАТ, тээврийн хэрэгслийн болон авто зам ашигласны, зогсоолын төлбөрөөс чөлөөлөх, цахилгаан автомашин худалдаж авах иргэдэд хөнгөлөлттэй, урт хугацаатай зээлийг олгодог байх, одоо үйл ажиллагаа явуулж байгаа шатахуун түгээх станцуудынхаа хүчин чадлыг нэмэгдүүлж, эрх зүйн орчныг сайжруулах, цэнэглэгчээ эх орондоо үйлдвэрлэх, угсрах, шинэ технологи нутагшуулах санаачилгыг дэмжиж, хамтран ажиллана.
Мөн цахилгаан автомашин худалдан борлуулагч аж ахуйн нэгжүүдийг дэмжиж, засвар үйлчилгээг нь сайжруулан, инженер техникийн ажилчдыг дадлагажуулж бэлдэх, хамгийн чухал асуудал болох аюулгүй байдалд нь стандарт тогтоох, шинэчлэх шаардлагатай байна.
Импортлоод, үйлдвэрлээд зогсохгүй батарейг дахин боловсруулан сэргээх, устгах бүхий л тогтолцоог бүрдүүлэн байгаль орчиндоо ээлтэй байна.
Төрийн болон орон нутгийн өмчийн оролцоотой байгууллага, аж ахуйн нэгжийн үйлчилгээндээ ашигладаг суудлын машины 60 хувь, хот суурин газрын нийтийн тээвэр, шуудан хүргэлт, хүнс, бараа түгээх зэрэг үйлчилгээний тээврийн хэрэгслүүдийн 70 хувь, иргэдийн 5 хувь нь цахилгаан машинтай болж, улмаар 2026 он гэхэд 20.000 цахилгаан тээврийн хэрэгслийг нэвтрүүлнэ гэсэн холбогдох тооцоо, судалгааг гаргалаа.
Эдгээр шийдлүүдийг бүрэн ажил хэрэг болгосноор тээврийн хэрэгслээс ялгарах хортой, хүлэмжийн хийг бууруулах онцгой чухал ач холбогдолтой юм гэж ЗТХЯ-наас мэдээллээ.
