Энэхүү төмөр замын нээлтэд Ерөнхий сайд Л.Оюун-Эрдэнэ, Зам, тээврийн хөгжлийн сайд С.Бямбацогт нарын албаныхан оролцох юм. Уг замын бүтээн байгуулалтын ажлыг ийнхүү эхлүүлж, ирэх аравдугаар сард ашиглалтад оруулахаар төлөвлөж буй аж.
Энэ талаар Зам, тээврийн хөгжлийн сайд С.Бямбацогт хэлэхдээ, “Шивээхүрэнгээс Сэхэ чиглэлийн төмөр зам барьж байгуулах эрхийг Нарийнсухайт төмөр замын компанид олгосон. Энэхүү төмөр замыг Нарийнсухайтын бүлэг ордоос Хятад улс руу нүүрс экспортлох зорилгоор хийж буй. Гол төмөр зам 7 км, салбар төмөр зам 20 орчим км байх бөгөөд 200 гаруй тэрбумын хөрөнгө оруулалтаар хувийн хэвшил хийж хэрэгжүүлж байна. Уг төмөр замыг зургаан жил ашигласны дараа 100 хувь төрийн өмчид үнэ төлбөргүй шилжүүлэн өгөх юм.
Мөн Шивээхүрэн, Нарийнсухайт, Арц суурь чиглэлийн 1250 км төмөр зам барьж байгуулах ажлыг энэ оны гуравдугаар улиралд багтаан эхлүүлэх төлөвлөгөөтэй. Хөөт, Бичигт, Зүүн хатавч чиглэлийн 426 км төмөр замын ажлыг эхлүүлэхээр сонгон шалгаруулалт зарлаж, компанийг сонгоод байна. Зургаадугаар сард багтаан концессын гэрээ байгуулна. Ийнхүү Монгол Улсын Засгийн газрын мөрийн хөтөлбөрт тусгагдсан хил холболтын төмөр зам барьж байгуулах ажлууд эрчимтэй явагдаж байна” гэлээ.
