Монгол Улсын Сайд, ЗГХЭГ-ийн дарга Д.Амарбаясгалан тайлбар хийжээ. Тэрбээр “Монгол Улсын Засгийн газраас “нүүрсний хулгай”-н асуудлыг олон нийтэд анх дэлгэж, иргэдийнхээ жагсаал тэмцэл, шаардлагын дагуу нүүрсний гэх тодотголтой “хулгай”-н асуудлыг шуурхай шийдвэрлэхэд анхаарч ажиллаж байна.
Гэтэл сүүлийн үед нүүрсний хулгайн асуудлын “жинхэнэ эзэд”-ээс нь өөр хүмүүст нялзаах, хамаатуулах сонирхолтой хэсэг бүлэг этгээд, албан тушаалтан нь өөрсдийн эрх ашгийн төлөө бусдыг гүтгэж эхэллээ.
Миний ах дүү нар ийм чиглэлийн бизнес эрхэлдэггүй, уул уурхайн тэр дундаа нүүрсний, нүүрс тээврийн ямар ч компани байхгүй болно. Гэтэл NTV телевизийн “Улаан бал” ярилцлагын нэвтрүүлэгт оролцсон /2022.12.20/ ЗТХЯ-ны Тээврийн бодлого зохицуулалтын газрын дарга асан Д. Батбаатар гэгч нь “ЗГХЭГ-ын дарга Д.Амарбаясгалангийн төрсөн ах нь нүүрсний 5-7 компанитай” гэж огт ор үндэсгүй мэдээлэл хийлээ. Тиймээс дээрх худал мэдээллийг түгээсэн этгээдийг шалгуулахаар хууль, хяналтын байгууллагад хандахаа мэдэгдэж байна.
Ард түмний мэдэлд байхаар хуульчлагдсан байгалийн баялгаас завшсан этгээдүүдтэй хийх тэмцэл үргэлжилж, иргэдийнхээ алдагдсан боломжийг нөхөх бодлого шийдвэрүүдийг Засгийн газрын зүгээс гаргасаар байх болно. Энэ тэмцлийг сулруулах, хүчгүйдүүлэх гэсэн явуулгуудыг огт хүлээн зөвшөөрөхгүй, хуулийн хүрээнд зарчим барьж ажиллана гэдгээ дахин илэрхийлье.” гэсэн байна.