Г.Занданшатар: Ахмад настны хөдөлмөр эрхлэлтийг дэмжсэн бодлого хэрэгжүүлнэ

Жил бүрийн 10-р сарын нэгэнд  Олон улсын Ахмадын өдөр тохиодог. Манай улс 1992 оноос хойш Ахмадын өдрийг тэмдэглэж ирсэн уламжлалтай. 2021 оны жилийн эцсийн байдлаар Нийслэлийн 9 дүүрэгт 153724 ахмад настан амьдарч байгаагаас 100 ба түүнээс дээш насны 17 ахмад настан, 90-99 насны 1164, 80-89 насны 9432,70-79 насны 29577, 60-69 насны 66167, 55-59 насны 47810 ахмад настан байна.

Энэ өдрийг тохиолдуулан зохион байгуулж буй Нийслэлийн Ахмадын нэгдсэн арга хэмжээнд УИХ-ын дарга Г.Занданшатар оролцож ахмадуудад баяр хүргэхийн зэрэгцээ Ахмад настны нийгмийн хамгааллын талаар УИХ-аас авч хэрэгжүүлж буй бодлого арга хэмжээний талаар дэлгэрэнгүй мэдээлэл өгсөн юм.

Монгол Улсын Их Хурал 2017 онд Ахмад настны тухай хуулийг шинэчлэн баталсан. Хууль батлагдсанаар Ахмад настнуудын хөгжил, нийгмийн халамж, хамгааллын чиглэлд тодорхой ахиц дэвшил гарсан ч цар тахлын улмаас цаг хугацаа алдаж, хэрэгжүүлж чадаагүй ажлуудаа үр дүнг хүргэх шаардлагагүй байгааг УИХ-ын дарга онцолж байв.

Харин одоо Ахмад настнуудын мэдлэг чадвар, ажил амьдралын арвин их туршлагыг залуу үедээ хуваалцах, тэдний орлогыг нэмэгдүүлэх зорилгоор Ахмад настны хөдөлмөр эрхлэлтийг дэмжсэн бодлого баримталж, холбогдох хууль эрх зүйн орчныг бүрдүүлэхээр холбогдох  хуулийн төслийг  төсвийн хуультай хамтатган энэ намрын чуулганаар хэлэлцэх төлөвлөж байгааг  УИХ-ын дарга яриандаа дурдсаныг Нийслэлийн ахмадууд талархан дэмжиж байгаагаа илэрхийллээ.

УИХ-ын дарга Г.Занданшатар хэлэхдээ “аж үйлдвэрээ сэргээх зайлшгүй шаардлага бидний өмнө тулгараад байна. Энэ их өөрчлөлтөд Ахмад үеийн туршлага, мэдлэг, чадвар их хувь нэмрээ оруулна гэдэгт итгэлтэй байна. Иймд Ахмад настны хөдөлмөр эрхлэлтийг дэмжсэн бодлогыг хэрэгжүүлэх нь зүйтэй. Тэтгэвэрт гарсан гэж хязгаарлалгүйгээр Ахмад настнуудыг бүх шатанд ажиллуулж, ажлынх нь арвин мэдлэг туршлагыг ашиглах шинэ тогтолцоог бүрдүүлэх нь зүйтэй. Ийм ч учраас бид төрийн бүх байгууллагуудыг орлого олох боломжийг нээж, нийгмийн асуудлаа шийдэж, ажилтнуудынхаа цалин орлогыг нэмэгдүүлэх боломжийг эрэлхийлж ажиллах нь зүйтэй гэж үзэж байна” гэсэн юм.

Мөн УИХ-ын намрын ээлжит чуулганаар эдийн засгаа сэргээх, тогтвортой өсөлтийг бий болгохтой холбоотой бодлогыг хэрэгжүүлэхэд онцгой анхаарна. Ингэснээр Ахмад настны нийгмийн хамгаалал, тэтгэвэр, тэтгэмжтэй холбоотой асуудлуудыг шийдвэрлэх боломж бүрдэх юм гэж УИХ-ын дарга хэлэв.