Энэ онд 1200 төрийн үйлчилгээг цахимжуулна

Улсын Их Хурлын Инновац, цахим бодлогын байнгын хороо өчигдөр хуралдав.

Засгийн газрын тогтоолоор “E-Mongolia академи” улсын төсөвт үйлдвэрийн газрыг шинээр байгуулсан. Тус академи төрийн байгууллагын мэдээллийн системийг хөгжүүлэх, цахим шилжилт хийхэд мэргэжил арга зүйн туслалцаа үзүүлэх, иргэдийн мэдээллийн технологийн ур чадварыг дээшлүүлэх чиглэлээр сургалт хийх чиг үүрэгтэй.

Энэ хүрээнд орон нутагт төрийн үйлчилгээг цахимжуулах, хүний нөөцийн чадавхыг сайжруулах ажлууд хийж байна. Одоогоор www.e-mongolia.mn системд 562 төрийн үйлчилгээг нэгтгэж, жил гаруй хугацаанд 70 орчим тэрбум төгрөг хэмнэсэн гэсэн урьдчилсан тооцоо гарчээ.

Энэ онд 1200 төрийн үйлчилгээг цахимжуулна. Төр нийт 15 мянган орчим үйлчилгээ үзүүлдэг. Нэг талаар энэ тоон үзүүлэлт сайн боловч нөгөө талаар төрийн бүтэц хэт данхайсныг харуулна. Иймд төрийн үйлчилгээний бүтцийг загварчилж, бүх салбарт инновацыг дэмжих санхүүжилтийн зөв тогтолцоо бүрдүүлэх шаардлагатайг Боловсрол, шинжлэх ухааны сайд, Цахим хөгжил, харилцаа холбооны сайдын үүргийг хавсран гүйцэтгэгч Л.Энх-Амгалан онцолжээ.

Xилийн боомтууд, алслагдсан сум, багийг шилэн кабельд холбох, Кибер аюулгүй байдлын тухай хуульд заасан Үндэсний төв, Нийтийн төвүүдийг байгуулахдаа программын аюулгүй байдал, хамгаалалтад онцгой анхаарах хэрэгтэйг УИХ-ын гишүүн Ц.Сэргэлэн сануулав.

Энэ онд таван сумыг шилэн кабельд холбосноор манай улсын 330 сум бүгд шилэн кабельд холбогдоно. Цаашид сансрын холбоо ашиглаж, хүн амыг өндөр хурдны интернетийн сүлжээнд холбох ажлыг судалж эхэлжээ.

Тагнуулын ерөнхий газраас цахим шилжилтийн хуулийг хэрэгжүүлэхэд шаардлагатай дүрэм, журам, аргачлал, стандарт, төлөвлөгөө боловсруулж, холбогдох судалгаа, тооцооллын хамт Цахим хөгжил, харилцаа холбооны яаманд хүргүүлжээ.

Засгийн газраас үндэсний инновац, технологийн тогтолцоог бэхжүүлэхэд шаардлагатай төсөв санхүүжилтийг нэмэхэд анхаарах, хүний нөөцийг бодлогоор дэмжиж бэлтгэхэд анхаарах хэрэгтэйг УИХ-ын гишүүн Н.Учрал, Ч.Ундрам нар хэллээ.

Гадаад харилцааны сайд Б.Батцэцэг, хилийн чанадад байгаа дипломат төлөөлөгчийн газруудын үйл ажиллагааг цахимжуулж эхэлсэн гэв.

Е-Монголиа аппликэйшнд гадаадад байгаа иргэдэд зориулсан цэс нэмж, 40 төрлийн үйлчилгээг цахимаар авах боломж бүрдүүлжээ. Дипломат төлөөлөгчийн газруудад цахим нотариатын үйлчилгээ нэвтрүүлэхээр Гадаад харилцааны яам Нотариатчидын танхим хооронд гэрээ байгуулсан байна.

Консулын үйлчилгээний төлбөрийг Гэрэгэ ТҮЦ машинаар авч, “Монгол шуудан” болон хүргэлтийн үйлчилгээ үзүүлдэг компанитай хамтран ажиллаж, иргэдийн ачаалал, бөөгнөрөл үүсдэгийг бууруулжээ. Түүнчлэн Е-виз систем нэвтрүүлсэн гэв. Тэрбээр иргэд визгүй зорчих орны тоо хоёроор нэмэгдсэн, дахин дөрвөн улстай визгүй зорчих асуудлыг шийдвэрлэхээр хэлэлцээр хийж байна гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Хариулт үлдээнэ үү

Таны имэйл хаягийг нийтлэхгүй. Шаардлагатай талбаруудыг * гэж тэмдэглэсэн