Хөтөлийн “Цемент шохой” ХК-ийн нэр өөрчлөгдөж, өр нь 355 тэрбумд хүрч, эзэн нь нас барж, хариуцах эзэнгүй болсон байжээ

Засгийн газрын өчигдрийн ээлжит хуралдаанаар Хөтөлийн “Цемент шохой” ХК-ийн хувьчлалыг хүчингүй болгосон юм. Тус үйлдвэрийг төрийн өмчид авч буйтай холбогдуулан Төрийн өмчийн бодлого зохицуулалтын газраас мэдээлэл хийж, хаалттай байсан мэдээллүүдийг ил болгож байгаагаа мэдэгдэв.

Засгийн газар 2015 онд хийсэн өмч хувьчлал буруу байсныг залруулж, алдагдсан өмчөө буцаан авч байна гэж ойлгох хэрэгтэй хэмээн ТӨБЗГ-ын дарга Б.Цэнгэл хэлж байна. Засгийн газар 2015-2016 онд хувьчлах, өөрчлөн байгуулах төрийн өмчит болон төрийн өмчийн оролцоотой хуулийн этгээдийн жагсаалт батлах тухай Засгийн газрын 2015 оны наймдугаар сарын 17-ны өдрийн 330 дугаар тогтоолын хавсралтаар баталсан 2015-2016 онд хувьчлах, өөрчлөн байгуулах төрийн өмчит хуулийн этгээдийн жагсаалтын 15 дугаар хэсэгт дурдсан “Хөтөлийн цемент шохой” ТӨХК-тай холбогдолтой заалтыг бүхэлд нь хүчингүй болгожээ.

Хувьчлал явагдах үед үйлдвэрийн 119 сая хувьцааг 1.4 тэрбум төгрөгөөр үнэлсэн байжээ. Мөн хувьчлал явагдах үед үйлдвэрийн өр авлага нь 30 гаруй тэрбум төгрөг байсан аж.  Хөтөлийн үйлдвэрийн гол худалдан авагч нь Эрдэнэт үйлдвэр бөгөөд хамгийн оргил үедээ 500 мянган тонн цементийг үйлдвэрлэж байсан байна. Гэвч үйлдвэрийн удирдлагууд энэ өрийг төлөөгүй байсныг хуулийн дагуу шалгаж тодруулах байх хэмээн Б.Цэнгэл ярив.

Хөтөлийн “Цемент шохой” ХК-ийн асуудлаар мэдээлэл өгөхдөө ТӨБЗГ-ынхан Хөгжлийн банкны зээлийн мэдээллийг дэлгэлээ. Хөтөлийн “Цемент шохой” ХЗ тус банкнаас нийт 1,2 их наяд төгрөгийн зээл авсан бөгөөд үүнээс 377 тэрбум төгрөгийн зээлийг төлжээ. Одоо үлдэгдэл 895 тэрбум төгрөг бий гэнэ.

“Хөтөл” ХХК нь 2016 оноос хойш тасралтгүй алдагдалтай ажилласан бөгөөд үйл ажиллагаа явуулахаа зогсоосон тул орлогогүй, их хэмжээний буюу 355 тэрбум төгрөгийн өртэй үлдсэн байжээ.

УИХ, Засгийн газар, Төрийн өмчийн хорооны тогтоолоор 2015 онд “Хөтөлийн цемент шохой” төрийн өмчит хувьцаат компанийн өмчит хувьцаат компанийн төрийн эзэмшлийн хувьцааг өр төлбөрийг төлөх нөхцөлтэйгөөр хөрөнгө оруулагч талд санал болгон хувьчилж, “Бейзмент” ХХК-д хувьцааны өмчлөгчийн эрхийг олгосон байна.

Монгол Улсын Хөгжлийн банкнаас мэдээлснээр “Бейзмент” ХХК-д 2010 онд олгосон 61,3 сая ам.долларын зээл, зээлийн хүүг хугацаандаа төлөөгүй, зээлийн гэрээний хугацаа дууссан боловч өр нь 295 тэрбум төгрөг болсон байна.

“Хөтөл” ХХК-ийн хувьцаа эзэмшигч нас барснаас хойш өвлөгч нь өв хүлээн авахаас  татгалзсан бөгөөд өв залгамжлах хуулийн хугацаа өнгөрсөн тул эзэнгүй өмчөөр тооцуулан төрийн зохих байгууллагын (Хөгжлийн банк) өмчлөлд шилжүүлэх арга хэмжээ авах замаар “Хөтөлийн цемент шохой” ХК-ийн хувьцаа эзэмшигч болох, улмаар зээлийн эргэн төлөлтийг тус компанийн үйлдвэрлэл, үйл ажиллагааны үр дүнгээр богино хугацаанд барагдуулах ажлыг зохион байгуулах саналыг Хөгжлийн банк гаргасан байна.

“Бейзмент” ХХК нь ”Хөтөл” ХХК болон нэрээ өөрчилжээ. “Хөтөл” ХХК нь 2016 оноос хойш тасралтгүй алдагдалтай ажилласан бөгөөд үйл ажиллагаа явуулахаа зогсоосон тул орлогогүй, их хэмжээний буюу 355 тэрбум төгрөгийн өртэй, хариуцсан ажилтан байхгүй, оршин суух хаяггүй, эзэнгүй болсон байжээ.