Автотээврийн үндэсний төв нь 2021 онд 25.3 тэрбум төгрөгийн орлогын төлөвлөгөөтэй ажилласнаас, 25.4 тэрбум төгрөгийн орлого төвлөрүүлж төлөвлөгөөг 100 хувь ханган биелүүлжээ.
Тус төв нь энэ сарын 20-ны байдлаар 102408 тээврийн хэрэгсэл шинээр бүртгэж, 475327 тээврийн хэрэгслийн шилжилт хөдөлгөөн хийж ажиллажээ. Мөн Монгол Улсын хэмжээнд 766984 тээврийн хэрэгслийг техникийн хяналтын үзлэгт хамруулсан байна. Хот хоорондын нийтийн зорчигч тээврийн үйлчилгээг 63 ААНБ-тай гэрээ байгуулан 63 чиглэлд 772 тээврийн хэрэгсэл, 1653 мэргэшсэн жолоочтойгоор гүйцэтгүүлж, нийт 594,300 зорчигч тээвэрлэн улс хоорондын байнгын ачаа тээвэрлэлтийг 10 боомтын чиглэлд 496 аж ахуйн нэгж байгууллагын 26184 тээврийн хэрэгсэл, 2059 мэргэшсэн жолоочтойгоор гүйцэтгэжээ. Дашрамд дурдахад, Тээврийн хэрэгслийн улсын дугаарын цахим дуудлага худалдааны системийг 2021.02.15-ны өдрөөс нэвтрүүлж 1935 дугаарыг дуудлага худалдаанд оруулж 1793 дугаарыг худалдан борлуулж нийт 3.121.050.000 төгрөгийг холбогдох дансанд төвлөрүүлжээ.
