Цасан шуурганд төөрч, дүүгээ авраад амиа алдсан охинд “Онцгой үйлстэн” медаль нөхөн олгожээ
Одоогоос 7 жилийн өмнө Увс аймгийн Цагаанхайрхан сумын Хунт багт өвөлжиж байсан Ц.Сансарбаярын хоёр тэрсхэн охин хөхөө өвлийн хүйтэнд гэрээсээ хөтлөлцөж гараад төөрч, улмаар цасан шуурганд 7 настай эгч нь осгож, дүү нь амьд үлдэж байсан харамсалтай хэрэг гарч байв. Тэр өдөр нүүр нүдгүй цасан шуурга шуурч, цаг агаар муу байсан тул хоёр охин нь гэртээ байхаас айж, аав, ээжийнхээ араас хувцсаа өмсөөд, гэрээсээ гарсан байдаг. Гурван километрийн зайтай байрлах саахалт айлынд очих замдаа хоёр охин төөрч, цасан шуурга сөрж, эцсээ хүртэл тэмцсээр эцэст нь эгч нь амиа алдаж, бага охин нь амьтай, голтой олдож, амь аврагдсан юм. Долоохон настай охин 5 настай дүүгээ аврахын тулд өмсөж явсан малгайгаа дүүдээ өмсгөж, ороолтоороо гарыг нь боож, гадуур хувцсаа хүртэл тайлж өгөн, салхины нөмрөөс дүүгээ хамгаалан тэвэрч, өмссөн гутал, нимгэн өмд, цамцтайгаа цасан шуурган дунд тарчилж хоносон охины сүүлчийн хүсэл нь дүүгээ аврах байлаа.